ટાઇટેનિક જહાજના કાટમાળથી પણ 1600 ફૂટ નીચે ટાઇટન કેપ્સ્યૂલનો કાટમાળ મળી આવ્યો છે. કેપ્સ્યૂલમાં હાજર તમામ પાંચ લોકોનાં મોત થયા છે. જેમાં બ્રિટિશ બિઝનેસમેન હેમિશ હાર્ડિંગ, ફ્રેન્ચ ડાઈવર પૉલ-હેનરી, પાકિસ્તાની -બ્રિટિશ બિઝનેસમેન શહજાદા દાઉદ, તેનો પુત્ર સુલેમાન અને ઓશનગેટ કંપનીના સીઈઓ સ્ટોકટન રશનો સમાવેશ થાય છે. યુએસ કોસ્ટ ગાર્ડના અધિકારીઓએ ગુરુવારે આની પુષ્ટિ કરી હતી. ટાઇટેનિકનો કાટમાળ બતાવવા ગયેલી આ કેપ્સ્યૂલ 4 દિવસ એટલે કે 18 જૂનની સાંજથી ગુમ હતી.
યુએસ કોસ્ટ ગાર્ડના આર એડમિરલ જ્હોન મૌગરે કહ્યું- એટલાન્ટિક મહાસાગરમાં કેપ્સ્યૂલના કાટમાળને રિમોટલી ઓપરેટેડ વાહન દ્વારા શોધી કાઢવામાં આવ્યો હતો. શક્ય છે કે તેમાં વિસ્ફોટ થયો હોય. જોકે વિસ્ફોટ ક્યારે થયો તે હાલ જણાવવું મુશ્કેલ છે.
રોઇટર્સ અનુસાર, કેપ્સ્યૂલને 18 જૂને ભારતીય સમય અનુસાર સાંજે 5:30 વાગ્યે એટલાન્ટિક મહાસાગરમાં છોડવામાં આવી હતી. તે 1:45 કલાક પછી ગુમ થઈ ગઇ. છેલ્લા 4 દિવસથી સર્ચ ઓપરેશન ચાલી રહ્યું હતું, જેને હવે પાછું ખેંચી લેવામાં આવ્યું છે. શોધમાં યુએસ, કેનેડા, ફ્રાન્સ અને બ્રિટનના એરક્રાફ્ટ અને જહાજો સામેલ હતા.
સીએનએન અનુસાર, 22 ફૂટ લાંબી ટાઇટન કેપ્સ્યૂલના 5 ભાગો કાટમાળમાંથી મળી આવ્યા છે. જેમાં ટેલ કોન અને પ્રેશર હલના 2 સેક્શન સામેલ છે. યુએસ કોસ્ટ ગાર્ડના અધિકારીઓએ જણાવ્યું કે હજુ સુધી કાટમાળમાંથી કોઈ મુસાફરના અવશેષો મળ્યા નથી. કેપ્સ્યૂલ બનાવનારી કંપની ઓસેનગેટે કહ્યું- અકસ્માતમાં મૃત્યુ પામેલા લોકો સાચા સંશોધક હતા. આ મુશ્કેલ સમયમાં અમે તેમના પરિવાર સાથે છીએ. કોસ્ટ ગાર્ડના એડમિરલ મૌગરે જણાવ્યું કે રોબોટિક એરક્રાફ્ટ એટલાન્ટિક મહાસાગરમાં કાટમાળ એકત્ર કરવાનું ચાલુ રાખશે. તેના દ્વારા અકસ્માત અંગે વધુ માહિતી એકઠી કરવાનો પ્રયાસ કરવામાં આવશે. જો કે, દરિયામાં આટલા ઊંડાણમાં મૃત્યુ પામેલા લોકો વિશે કંઈપણ શોધવું ખૂબ મુશ્કેલ છે.
આ પહેલા બુધવારે કેનેડા તરફથી સર્ચ ઓપરેશનમાં સામેલ એક એરક્રાફ્ટે સોનાર બોયની મદદથી કેટલાક અવાજો સાંભળ્યા હતા. NN અનુસાર, તે તે જ સ્થાનની નજીક રેકોર્ડ કરવામાં આવ્યું હતું જ્યાં ટાઇટેનિકનો કાટમાળ સ્થિત છે. અવાજો લગભગ 30 મિનિટના અંતરાલમાં રેકોર્ડ કરવામાં આવ્યા હતા. પછી 4 કલાક પછી સોનારે ફરીથી તેમને શોધી કાઢ્યા.
