ટમેટામાં બેફામ ભાવ વધારો : ઉત્તરાખંડમાં રૂા.200 થી 250

ટમેટા સહિત શાકભાજીના ભાવમાં ધરખમ વધારાના પગલે દેશભરમાં ઉહાપોહ સર્જાયો છે ત્યારે ભાવ વધુને વધુ વધી રહ્યા હોય તેમ ઉત્તરાખંડ જેવા રાજયોમાં ટમેટાનો ભાવ 200 થી 250 રૂપિયાએ પહોંચ્યો છે. હવે બટેટા તથા ડુંગળીના ભાવમાં વધારો થવાની આશંકા વ્યકત થઇ રહી છે. કેન્દ્ર સરકારના સત્તાવાર ટમેટાના ભાવ પણ રૂા.162 થયા છે.
ટમેટાના ઓછા ઉત્પાદન અને અછતની સ્થિતિ વચ્ચે દેશભરમાં ટમેટાના ભાવ મોંઘા થયા છે અને મોટો ઉહાપોહ છે ત્યારે ઉત્તર કાશીમાં ટમેટાના ભાવે અભુતપૂર્વ રેકોર્ડ સર્જયો છે. ઉત્તર કાશીમાં ટમેટા રૂા.200 થી 250ના ભાવે વહેચાતા હોવાનું બહાર આવ્યું છે. શાકભાજી વિક્રેતાએ જણાવ્યું કે ટમેટાની ખેતીને નુકસાની હોવાથી અદભુતપૂર્વ ભાવ વધારો છે. બીજી તરફ કેન્દ્ર સરકાર વિવિધ આવશ્યક ચીજો પર દૈનિક ધોરણે નજર રાખતી જ હોય છે. ગુરૂવારે દેશભરમાં ટમેટાનો સરેરાશ ભાવ પ્રતિ કિલો રૂા.162 નોંધાયો છે. મહાનગરોમાં રૂા. 152 ભાવ હતો.
જાણકારોના કહેવા પ્રમાણે હવે આવતા દિવસોમાં તહેવારોની મોસમ શરૂ થશે અને ત્યારે બટેટાનો વપરાશ વધી જતો હોય છે. થોડા દિવસોથી બટેટાના ભાવ વધવા લાગ્યા છે અને આવતા દિવસોમાં હજુ તેમાં વધારો થશે. આ સિવાય ડુંગળીના ઉત્પાદન વિશે પણ અટકળો વ્યકત થવા લાગી છે અને તેની અસરે તેના ભાવ પણ વધી શકે તેમ હોવાનું જાણકારોએ જણાવ્યું છે. કેન્દ્રીય મંત્રીએ જોકે એવો દાવો કર્યો કે ડુંગળી બટેટાના ભાવ હજુ સુધી નિયંત્રણમાં છે. પરંતુ શાકભાજી ક્ષેત્રના જાણકારોના મતે આવતા દિવસોમાં ડુંગળી, બટેટા પણ મોંઘા થઇ શકે છે.