કહેવાય છે કે જો દિલમાં જોશ હોય તો દરેક સપના સાકાર થાય છે. દરેક વ્યક્તિ મોટા સપના જુએ છે, પરંતુ એવા થોડા જ લોકો હોય છે જેમનું નસીબ ચમકે છે અને તેમને આખી દુનિયામાં એક અલગ ઓળખ બનાવવાની સોનેરી તક મળે છે.
આવું ઘણીવાર ક્રિકેટમાં જોવા મળે છે, જ્યાં ઘણા યુવા ખેલાડીઓને તેમના શાનદાર પ્રદર્શનને કારણે રાષ્ટ્રીય ટીમ માટે સિલેક્ટ થાય છે. આવું જ કંઈક કેરળના વાયનાડ જિલ્લાની આદિવાસી દીકરી મીનુ મણિ સાથે થયું છે. તેની મહેનત રંગ લાવી છે. સંઘર્ષોથી ભરેલા જીવન બાદ મીનુને તેનો પુરસ્કાર મળ્યો છે.
વાસ્તવમાં, ભારતીય મહિલા ક્રિકેટ ટીમ ઢાકાના શેર-એ બાંગ્લા સ્ટેડિયમમાં 9 જુલાઈએ એટલે કે આજે બાંગ્લાદેશ વિરુદ્ધ ત્રણ મેચની T20 શ્રેણીની પ્રથમ મેચ રમી રહી છે. હરમનપ્રીત કૌરની આગેવાનીમાં ટીમ ઈન્ડિયાએ મેચમાં ટોસ જીતીને પહેલા બોલિંગ કરવાનો નિર્ણય કર્યો હતો. આ મેચ પહેલા ભારતીય ટીમ તરફથી ડેબ્યૂ કેપ મીનુ મણિ અને અનુષા બરેદ્દીને પહેરાવવામાં આવી હતી. આ બંને યુવા ખેલાડીઓએ બાંગ્લાદેશ સામે આંતરરાષ્ટ્રીય ક્રિકેટમાં પદાર્પણ કર્યું છે.
મીનુ મણીની સંઘર્ષોથી ભરેલી કહાણી
જણાવી દઈએ કે, મીનુને મહિલા IPL ઓક્શનમાં દિલ્હી કેપિટલ્સે 30 લાખ રૂપિયામાં ટીમાં સામેલ કરી હતી. મીનુ કેરળની એકમાત્ર ક્રિકેટર છે, જેણે ક્રિકેટની શરૂઆત ત્યારે કરી જ્યારે તેનો પરિવાર આર્થિક રીતે સંઘર્ષ કરી રહ્યો હતો. માતા-પિતાને તેણીને આ રમત રમવાનું બિલકુલ પસંદ ન હતું, કારણ કે તેઓ માનતા હતા કે આ રમત ફક્ત છોકરાઓને જ અનુકૂળ આવે છે, છોકરીઓ તેને રમી શકતી નથી, પરંતુ મીનુને આ રમત પ્રત્યે એટલો લગાવ હતો કે તેણે 8માં ધોરણમાં જ આ રમત રમવાનું અને કોચિંગ લેવાનું શરૂ કરી દીધું હતું. આ પછી તેણે તેના પરિવાર સાથે ઘણીવાર ખોટું બોલ્યું જેથી તે ક્રિકેટ રમી શકે. તે અભ્યાસના બહાને ક્રિકેટ રમવા જતી હતી. તે 42 કિલોમીટર દૂર ચાર બસ બદલીને ક્રિકેટ રમતી હતી. મીનુના પિતા કુલી છે અને માતા ઘરનું કામકાજ સંભાળે છે.
આવી સ્થિતિમાં, આર્થિક સ્થિતિ સારી ન હોવાથી, તે તેના પરિવારને મદદ કરવા માંગતી હતી અને બાંગ્લાદેશ સામે ભારત A તરફથી રમી હતી, જ્યાંથી તેને પાંચ લાખ રૂપિયા મળ્યા હતા. આ પૈસાથી તેણે ઘર બનાવ્યું હતું, પરંતુ તેનું ઘર 2018-19માં આવેલા પૂરમાં ધોવાઈ ગયું હતું અને તેણે બાંગ્લાદેશ સામે મળેલી મેચ ફીથી તેને ફરીથી બનાવ્યું હતું.
