શ્રીલંકા અને પાકિસ્તાન ક્રિકેટ ટીમ વચ્ચે કોલંબોમાં રમાઈ રહેલી બીજી ટેસ્ટ મેચના ત્રીજા દિવસે આજે 23 વર્ષીય પાકિસ્તાની બેટ્સમેન અબ્દુલ્લા શફીકે શાનદાર સદી ફટકારી છે. શફીકની ટેસ્ટ કારકિર્દીની આ ચોથી સદી છે. તેણે 149 બોલમાં સદી રમીને પાકિસ્તાનને મજબૂત સ્થિતિમાં પહોંચાડ્યું છે. શ્રીલંકન ક્રિકેટ ટીમ સામે આ ફોર્મેટમાં શફીકની આ બીજી સદી છે.
પાકિસ્તાનના ઓપનર અબ્દુલ્લા શફીકે પ્રથમ દાવમાં પોતાની શાનદાર બેટિંગ કરીને ટીમને મજબૂત શરૂઆત અપાવી. સાથી ઓપનિંગ બેટ્સમેનના વહેલા આઉટ થયા બાદ તેણે પાકિસ્તાની ઇનિંગ્સને સંભાળી લીધી અને હાલમાં તે 122 રન પર બેટિંગ કરી રહ્યો છે. શ્રીલંકાના બોલરો હાલમાં તેને આઉટ કરવાનો પ્રયાસ કરી રહ્યા છે.
શફીકની કારકિર્દી શાનદાર રહી
જણાવી દઈએ કે જમણા હાથના બેટ્સમેન શફીકે પોતાના ટેસ્ટ ક્રિકેટ કરિયરમાં અત્યાર સુધી 14 મેચ રમી છે. 26 ઇનિંગ્સમાં તેણે અત્યાર સુધીમાં 47થી વધુની એવરેજ અને લગભગ 43ના સ્ટ્રાઇક રેટથી 1,100થી વધુ રન બનાવ્યા છે. ક્રિકેટના સૌથી લાંબા ફોર્મેટમાં તે 4 સદી ઉપરાંત તેણે ચાર અડધી સદી પણ ફટકારી છે. ટેસ્ટમાં તેનો સર્વોચ્ચ સ્કોર 160* રન છે.
શ્રીલંકા સામે શાનદાર રેકોર્ડ
જણાવી દઈએ કે 23 વર્ષીય બેટ્સમેન શફીકને ટેસ્ટ ક્રિકેટમાં શ્રીલંકન ટીમ સામે રમવાની મજા આવે છે. તેના આંકડાઓ પોતે તેના સાક્ષી છે. શ્રીલંકા સામે 4 ટેસ્ટમાં 60ની એવરેજ અને 44ની આસપાસના સ્ટ્રાઈક રેટથી 300થી વધુ રન બનાવ્યા. ટેસ્ટમાં તેની 4 સદીમાંથી 2 આ ટીમ સામે આવી છે.
પાકિસ્તાને શ્રેષ્ઠ બોલિંગ કરી
હાલમાં મેચની વાત કરીએ તો 2 ટેસ્ટ મેચની સિરીઝમાં પાકિસ્તાન 1-0થી આગળ છે. પાકિસ્તાને પ્રથમ મેચ જીતી હતી. બીજી ટેસ્ટમાં પણ પાકિસ્તાનની ટીમનો જ દબદબો છે. બોલિંગની વાત કરીએ તો અબરાર અહેમદ (4) અને નસીમ શાહ (3)ના શાનદાર પ્રદર્શનના કારણે શ્રીલંકા 166 રનમાં ઓલઆઉટ થઈ ગઈ હતી. હાલમાં પાકિસ્તાને પ્રથમ દાવમાં 3 વિકેટ ગુમાવીને 220 રન બનાવ્યા છે.
