ઈન્ડોનેશિયાનો બાલી સમુદ્ર વિસ્તાર વહેલી સવારે જોરદાર આંચકાથી હચમચી ગયો હતો. આ ભૂકંપની તીવ્રતા રિક્ટર સ્કેલ પર 7 માપવામાં આવી છે. જો કે ભૂકંપને લઈને સુનામીની કોઈ ચેતવણી જાહેર કરવામાં આવી નથી. હાલમાં કોઈ જાન-માલના નુકસાનના સમાચાર નથી.
યુરોપિયન-મેડિટેરેનિયન સિસ્મોલોજીકલ સેન્ટરએ અહેવાલ આપ્યો છે કે ઇન્ડોનેશિયાના બાલી સમુદ્ર ક્ષેત્રમાં 7 તીવ્રતાનો ભૂકંપ આવ્યો હતો. EMSCએ પણ અહેવાલ આપ્યો છે કે ભૂકંપનું કેન્દ્ર ઇન્ડોનેશિયાના માતરમથી 201 કિમી ઉત્તરમાં અને પૃથ્વીની સપાટીથી 518 કિમી નીચે હતું. ઇન્ડોનેશિયા ભૂકંપની દૃષ્ટિએ ખૂબ જ સંવેદનશીલ વિસ્તાર છે. ગયા વર્ષે નવેમ્બરમાં ઇન્ડોનેશિયાના પશ્ચિમ જાવા પ્રાંતમાં આવેલા ભૂકંપમાં 300 લોકોના મોત થયા હતા જ્યારે હજારો લોકો ઘાયલ થયા હતા. તે ભૂકંપની તીવ્રતા રિક્ટર સ્કેલ પર 5.6 માપવામાં આવી હતી. આ સિવાય યુએસ સુનામી ચેતવણી પ્રણાલી વતી કહેવામાં આવ્યું હતું કે ઊંડા સમુદ્રના ભૂકંપને કારણે સુનામીનો કોઈ ખતરો નથી.
