ગઈકાલે દક્ષિણ ગુજરાત અને સૌરાષ્ટ્રમાં કેટલાક જિલ્લામાં ભારેથી અતિભારે વરસાદની આગાહી વચ્ચે જૂનાગઢ, ગીર સોમનાથ, રાજકોટ, જામનગરમાં મેઘરાજાની ધમાકેદાર બેટિંગ જોવા મળી હતી. છેલ્લા 24 કલાકમાં રાજ્યના 145 તાલુકામાં વરસાદી માહોલ જામ્યો હતો. ગઈકાલે ગુજરાતમાં સૌથી વધુ સૌરાષ્ટ્રમાં મેઘમહેર જોવા મળી હતી. જેમાં સોમનાથના પાટણ-વેરાવળમાં અને જુનાગઢના માણાવદરમાં અને રાજકોટના વિંછીયામાં સૌથી વધુ 5 ઈંચ વરસાદ ખાબક્યો હતો. ત્યારબાર જુનાગઢનાં માંગરોળ, માળીયા હાટીનામાં 4-4 ઈંચ વરસાદ અને સાબરકાંઠાના ખેડબ્રહ્મામાં પણ 4 ઈંચ જેટલો વરસાદ નોંધાયો છે.
હવામાન વિભાગ દ્વારા કરવામાં આવેલી આગાહી અનુસાર, આજે ગુજરાતમાં તમામ જિલ્લાઓમાં વરસાદ થશે. દક્ષિણ ગુજરાતમાં સુરત, ડાંગ, તાપી, નવસારી અને વલસાડમાં ભારેથી અતિભારે વરસાદની સંભાવના વ્યક્ત કરાઈ છે. તો કચ્છ અને સૌરાષ્ટ્રના સુરેન્દ્રનગર, રાજકોટ, જામનગર, પોરબંદર, જૂનાગઢ, અમરેલી, ભાવનગર, મોરબી, દ્વારકા અને ગીર સોમનાથમાં વરસાદની આગાહી કરવામાં આવી છે.
