મહારાષ્ટ્રમાં ભાજપને અત્યાર સુધીની સૌથી મોટી જીત અપાવનાર દેવેન્દ્ર ફડણવીસ ત્રીજી વખત મુખ્યમંત્રી બનવા જઈ રહ્યા છે. RSS અને ભાજપે મળીને રાજ્યમાં સરકાર ચલાવવાની ફોર્મ્યુલા નક્કી કરી છે. આ મુજબ ફડણવીસ પહેલા અઢી વર્ષ માટે અને શિવસેના પ્રમુખ એકનાથ શિંદે આગામી અઢી વર્ષ માટે CM રહેશે. CM પદ છોડ્યા બાદ ફડણવીસને બીજેપીના રાષ્ટ્રીય અધ્યક્ષ બનાવવામાં આવશે.
સૂત્રએ ભાસ્કરને જણાવ્યું કે, ભાજપ અને RSSએ મળીને ફડણવીસની ભૂમિકા નક્કી કરી છે. તેમને અઢી વર્ષ માટે CM બનાવવા માટે ભાજપ અને શિવસેના વચ્ચે સમજૂતી થઈ છે. તે જ સમયે પાર્ટી હાઈકમાન્ડ અને RSS ફડણવીસને ભાજપના રાષ્ટ્રીય અધ્યક્ષ બનાવવા માટે તૈયાર છે.
સૂત્રોનું કહેવું છે કે RSSના વડા મોહન ભાગવત અને વડાપ્રધાન નરેન્દ્ર મોદી દેવેન્દ્ર ફડણવીસને CM બનાવવા માટે સહમત થયા છે. તેનું મુખ્ય કારણ ફડણવીસનું બંને સંગઠનોમાં સમાન સંકલન છે.જો ફડણવીસને અઢી વર્ષ પહેલા ભાજપના અધ્યક્ષ બનાવવામાં આવે છે, તો તેમના સ્થાને પાર્ટીના મહાસચિવ વિનોદ તાવડે અથવા પૂર્વ પ્રદેશ અધ્યક્ષ ચંદ્રકાંત પાટીલને મુખ્યમંત્રી બનાવવામાં આવી શકે છે. એકનાથ શિંદે અઢી વર્ષ પહેલા મુખ્યમંત્રી બનવાના નથી તે નિશ્ચિત છે.
દેવેન્દ્ર ફડણવીસે નાગપુર દક્ષિણ-પશ્ચિમ બેઠક પરથી ચૂંટણી જીતી હતી. આ બેઠક પરથી તેમની આ સતત ચોથી જીત છે. દેવેન્દ્ર ફડણવીસે કોંગ્રેસના પ્રફુલ્લ ગુડ્ડેને હરાવ્યા છે. 2014માં પણ બંને સામસામે હતા. તે સમયે ફડણવીસ 58,942 મતોથી જીત્યા હતા. 2019માં કોંગ્રેસે ઉમેદવાર બદલીને આશિષ દેશમુખને ટિકિટ આપી હતી. ત્યાર બાદ દેવેન્દ્ર ફડણવીસ 49,344 મતોથી જીત્યા.
