‘તંદુર’ હોટલમાંથી યુવતીની શંકાસ્પદ હાલતમાં લાશ મળી

અમદાવાદના રામોલ વિસ્તારમાં રહેતી અને એરપોર્ટ પર ફરજ બજાવતી એક યુવતીની એરપોર્ટ નજીક આવેલી તંદુર હોટલમાંથી શંકાસ્પદ હાલતમાં લાશ મળી આવતા ચકચાર મચી છે. પોલીસ તપાસમાં યુવતી સાથે એક યુવક પણ હોટલમાં આવ્યો હતો અને બાદમાં નીકળી ગયો હોય તેની શોધખોળ હાથ ધરી છે. યુવતીની હત્યા નિપજાવાઈ હોવાની આશંકા વ્યકત કરવામાં આવી રહી છે. રહસ્ય પરથી પડદો ઉંચકવા પોલીસે હાલ અલગ અલગ દિશામાં તપાસ હાથ ધરી છે.
મૂળ ઉત્તરપ્રદેશની અને હાલ રામોલમાં રહેતી 22 વર્ષીય નસરિનબાનું ફિરોઝ અખ્તર એરપોર્ટ પર કામ કરતી હતી. જ્યારે રવિવારે(16 માર્ચે) સાંજે તેની એરપોર્ટ પાસે આવેલ તંદુર હોટેલના રૂમમાંથી લાશ મળી આવી છે. તેને લઈને એરપોર્ટ પોલીસે ઘટના સ્થળે પોહચીને લાશને પોસ્ટમોટર્મ માટે મોકલી આપી છે. તેમજ અકસ્માત મોતનો ગુનો નોંધીને વધુ તપાસ શરૂ કરી છે. પોલીસની પ્રાથમિક તપાસમાં એક યુવક તેની સાથે રૂમમાં ગયો હતો. જે બાદ યુવક નીકળી ગયો હતો. હોટલના રૂમમાં યુવતીની હત્યા નિપજાવાઈ હોવાની આશંકા પણ વ્યકત કરવામાં આવી રહી છે. જો કે, પોલીસે હાલ હોટલના રૂમમાં યુવતી સાથે ગયેલા યુવકની શોધખોળ હાથ ધરી છે.