ગુજરાતમાં મહિલાઓ ઘરની અંદર પણ સુરક્ષિત નથી. ગુજરાતમાં છેલ્લા 6 મહિનામાં 46008 મહિલા સામે ઘરેલુ અત્યાચાર કરાયાના આંકડા બહાર આવ્યા છે. પરિવારના પુરુષ સભ્ય દ્વારા પોતાના જ પરિવારની મહિલા કે સગીરાનું શારીરિક શોષણ કરાયું હોવાના નોંધાયેલા હોય તેવા દર વર્ષે 1000 જેટલા કેસ આવે છે. પરિવારની આબરૂ ના જાય તે માટે આવા કેસ ઘરમેળે પતાવી દેવાતા હોય તેવા અનેક કેસ હશે.
હાઇકોર્ટમાં એક યુવકે દુષ્કર્મના કેસમાં 2 વર્ષની જેલ ભોગવ્યા બાદ તેની સામે ખોટો આક્ષેપ કરાયાનું બહાર આવ્યું હતું. સગીરાએ જન્મ આપેલા બાળકનો ડીએનએ કરાતા તે યુવક સાથે નહી પરંતુ તેના પિતરાઇ સાથે મેચ થયો હતો. પરિવારના દીકરાની આબરૂ ના જાય તે માટે સગીરાના પરિવારે તેના મિત્રનું ખોટું નામ આપ્યું હતું. આ કેસમાં નિર્દોષ યુવકને કોઇ વાંક-ગુના વગર જેલમાં જવું પડ્યું અને તેની સામાજિક પ્રતિષ્ઠાને નુકશાન પહોચ્યું હતું.
યુવકે પોતાની સામેના આરોપને રદ કરવા હાઇકોર્ટમાં અપીલ કરવી પડી અને કાનૂની ખર્ચ ભોગવવો પડ્યો હતો. પરંતુ સાચો આરોપી ઘરનો સભ્ય હોવાથી સગીરાના પરિવારે આગળ કેસ કરવાનું માંડી વાળ્યું હતું. આવા અનેક કેસ છે જેમાં પોકસોની ફરિયાદ કરાય છે, પરંતુ ટ્રાયલ શરૂ થયા બાદ અને ડીએનએના રિપોર્ટ બાદ એવી હકીકત જાણવા મળે છે કે બહારના નહી પણ ઘરના સભ્ય દ્વારા જ મહિલાનું શોષણ કરાયું હતું. ગુજરાતમાં મહિલા સાથે થતા અત્યાચાર પૈકીના 50 ટકાથી વધુ કિસ્સા તો ઘરના સભ્ય દ્વારા જ કરાય છે. સરકારને આવા કેસમાં મહિલાઓ માટે યોજના કરવા શું નીતિ છે તે રજૂ કરવા આદેશ કરાયો છે. તો બીજી તરફ હાઇકોર્ટની જુદી જુદી કોર્ટમાં મહિલાઓએ કરેલી અરજીઓમાં મોટા ભાગના કેસમાં તેના પરિવાર દ્વારા હેરાનગતિ થતી હોવાનું બહાર આવ્યું છે.
