ભારતીય મૂળના અનિતા આનંદ કેનેડાના નવા વિદેશમંત્રી બન્યા છે. મંગળવારે ગીતા પર હાથ રાખીને અનિતા આનંદે કેનેડાના નવા વિદેશ મંત્રી તરીકે શપથ લીધા. તે કેનેડાના વિદેશ મંત્રી બનનાર પ્રથમ હિન્દુ મહિલા પણ બન્યા છે. અનિતા આનંદનો જન્મ નોવા સ્કોટીયાના કેન્ટવિલેમાં થયો હતો. તેમના માતાપિતા ડોક્ટર હતા. તેમના પિતા તમિલનાડુના હતા અને માતા પંજાબના હતા. અનિતાને બે બહેનો છે, ગીતા આનંદ, જે ટોરોન્ટોમાં વકીલ છે, અને સોનિયા આનંદ, જે મેકમાસ્ટર યુનિવર્સિટીમાં ચિકિત્સક અને સંશોધક છે. આ વર્ષની શરૂઆતમાં જસ્ટિન ટ્રુડોના સ્થાને આવેલા અને ગયા મહિને ચૂંટણી જીતનારા કાર્નેએ મેલાની જોલીના સ્થાને અનિતા આનંદને વિદેશ પ્રધાન તરીકે નિયુક્ત કર્યા, અનિતા આનંદે અગાઉ સંરક્ષણ પ્રધાન સહિત અનેક ભૂમિકાઓ સંભાળી છે.
કાર્નેની સરકારમાં મેલાની જોલીને ઉદ્યોગ મંત્રી તરીકે નિયુક્ત કરવામાં આવ્યા છે. કેનેડા અને યુનાઇટેડ સ્ટેટ્સ વચ્ચેના વેપાર યુદ્ધ દરમિયાન ફ્રાન્કોઇસ-ફિલિપ શેમ્પેને નાણામંત્રી તરીકે પોતાનું પદ જાળવી રાખ્યું છે, જ્યારે ડોમિનિક લેબ્લેન્ક વેપાર મંત્રી બની રહ્યાછે. કાર્નેએ યુએસ પ્રમુખ ડોનાલ્ડ ટ્રમ્પ દ્વારા કેનેડા પ્રત્યે દર્શાવવામાં આવેલા આક્રમણનો સામનો કરવાનું વચન આપીને વડા પ્રધાન પદ જીત્યું. કાર્નેએ જણાવ્યું હતું કે કેનેડિયનોએ આ નવી સરકારને યુનાઇટેડ સ્ટેટ્સ સાથે નવા આર્થિક અને સુરક્ષા સંબંધોને વ્યાખ્યાયિત કરવા અને બધા કેનેડિયનો માટે મજબૂત અર્થતંત્ર બનાવવા માટે મજબૂત જનાદેશ સાથે ચૂંટી છે. કાર્નેએ જણાવ્યું હતું કે 27 મેના રોજ સંસદ ફરી શરૂ થશે ત્યારે કિંગ ચાર્લ્સ કેનેડિયન સરકારની પ્રાથમિકતાઓની રૂપરેખા આપતું ભાષણ આપશે.
