એક તરફ વડાપ્રધાન નરેન્દ્ર મોદીએ બ્રાઝિલમાં આયોજિત બ્રિક્સ સમિટ 2025માં ભાગ લીધો હતો, તો
બીજી તરફ, હવે ડોનાલ્ડ ટ્રમ્પે મોટી ધમકી આપી છે. સોમવારે અમેરિકન રાષ્ટ્રપતિએ બ્રિક્સ દેશો વિશે
એક મોટું નિવેદન આપીને સમગ્ર વિશ્વમાં હલચલ મચાવી દીધી છે.
ટ્રમ્પે ચેતવણી આપી છે કે જે પણ દેશ બ્રિક્સની ‘અમેરિકન વિરોધી નીતિઓ’ સાથે જોડાશે તેની પાસેથી
વધુ 10% ટેરિફ વસૂલવામાં આવશે. ટ્રમ્પે આ નિવેદન તેના સોશિયલ મીડિયા પ્લેટફોર્મ ‘ટ્રુથ સોશિયલ’
પર શેર કર્યું. ડોનાલ્ડ ટ્રમ્પે લખ્યું, ‘જે પણ દેશ બ્રિક્સની અમેરિકા વિરોધી નીતિઓમાં જોડાશે તેના પર
વધારાની 10% ટેરિફ વસૂલવામાં આવશે. આ નીતિમાં કોઈ અપવાદ રહેશે નહીં.
અમેરિકાની આ નવી જાહેરાત ભારત માટે પણ ચિંતાનો વિષય બની શકે છે. ભારત પણ બ્રિક્સનો એક
ભાગ છે. તાજેતરમાં પીએમ મોદી બ્રિક્સના 17મા સંમેલનમાં ભાગ લેવા માટે બ્રાઝિલના રિયો ડી જાનેરો
પહોંચ્યા હતા. તેમજ ભારતે અમેરિકા સાથે કેટલાક મહત્ત્વપૂર્ણ વેપાર કરારો કર્યા છે. માહિતી અનુસાર,
ભારતે અમેરિકા સાથે વચગાળાના વેપાર કરાર માટે કૃષિ અને ડેરી જેવા ક્ષેત્રોમાં મુખ્ય મુદ્દાઓ પર તેની
મર્યાદા નક્કી કરી છે. હવે આ કરારને અંતિમ સ્વરૂપ આપવાની જવાબદારી અમેરિકાના હાથમાં છે. એવું
કહેવાય છે કે જો મુદ્દાઓ ઉકેલાઈ જાય, તો 9 જુલાઈ પહેલા વચગાળાના વેપાર કરારની જાહેરાત થઈ
શકે છે.
