ઉત્તર પ્રદેશના કાસગંજમાં એક લગ્ન સમારોહનો આનંદ ગણતરીની ક્ષણોમાં જ લોહિયાળ શોકમાં ફેરવાઈ ગયો. ડીજે સંગીત વગાડવાને લઈને થયેલી સામાન્ય તકરારમાં વરરાજાના સાળાએ પોતાની કારથી પાંચ લોકોને કચડી નાખ્યા, જેમાં ત્રણ લોકોના ઘટનાસ્થળે જ મોત થયા છે, જ્યારે બે અન્ય ગંભીર રીતે ઈજાગ્રસ્ત થયા છે.
અહેવાલો અનુસાર, આ ઘટના ગુરુવારે (ચોથી ડિસેમ્બર) કાસગંજના ગંજદુંડવારા પોલીસ સ્ટેશન વિસ્તારમાં આવેલા ઝેડએસ પેલેસ ગેસ્ટ હાઉસમાં બની હતી, જ્યાં એક સમાજવાદી પાર્ટીના નેતાના પુત્રના લગ્નનો સમારોહ ચાલી રહ્યો હતો. વરરાજા પક્ષ અને કન્યા પક્ષ વચ્ચે ડીજે વગાડવાને લઈને નાનો ઝઘડો થયો હતો, જેણે ટૂંક સમયમાં લોહિયાળ સંઘર્ષનું સ્વરૂપ ધારણ કરી લીધું. અહેવાલો મુજબ, વરરાજાના પરિવારે દુલ્હનના પિતરાઈ ભાઈ પર હુમલો કર્યો હતો, જેનાથી તે યુવક ગુસ્સે ભરાયો હતો.
ગુસ્સે ભરાયેલા યુવકે તાત્કાલિક પોતાની કાર લઈને આવ્યો અને વરરાજાના પક્ષના લોકોને કચડી નાખ્યા. આ દુઃખદ અકસ્માતમાં વરરાજાના બે કાકા અને મામા સહિત ત્રણ લોકોના ઘટનાસ્થળે જ મોત થયા હતા. અન્ય બે જાનૈયા ગંભીર રીતે ઈજાગ્રસ્ત થયા હતા અને તેમને તાત્કાલિક હોસ્પિટલમાં દાખલ કરવામાં આવ્યા છે.
