ગુજરાતમાં યોજાયેલી સ્થાનિક સ્વરાજ્યની ચૂંટણીના પરિણામો આજે જાહેર થયા છે.રાજ્યમાં સરકાર વિરુદ્ધ લોકમાનસની સ્થિતિ હોવા છતાં મહાનગરપાલિકા,નગરપાલિકા અને જિલ્લા તેમજ તાલુકા પંચાયતમાં વધુ એક વખત ભાજપનો ભગવો લહેરાશે.બપોરના ૧૨ વાગ્યા સુધીમાં જાહેર થયેલા સ્થાનિક ચૂંટણીના પરિણામોમાં ભાજપના ઉમેદવારો જીત તરફ છે.દર વખતની માફક કોંગ્રેસ વધુ એક વખત વિરોધપક્ષમાં રહેશે.
બપોરના ૧૨:૦૦ કલાક સુધીમાં પ્રાપ્ત થયેલા પરિણામો મુજબ રાજ્યની ૧૫ મહાનગરપાલિકાની ચૂંટણીમાં કુલ ૧૦૪૪ બેઠકો પૈકી ૪૨૫ બેઠક ઉપર ભાજપના ઉમેદવારો વિજેતા થયા છે,મોટાભાગના વોર્ડમાં ભાજપની પેનલ વિજેતા જાહેર થઈ છે.બીજી તરફ કોંગ્રેસને માત્ર ૨૮ બેઠકો મળી છે જ્યારે ૦૪ બેઠક અન્યના ફાળે ગઈ છે.
રાજ્યની ૩૪ જિલ્લા પંચાયતની કુલ ૧૦૯૦ બેઠકોના પરિણામો જાહેર થઈ રહ્યા છે તેમાં ૨૦૭ બેઠક પર ભાજપના ઉમેદવારો વિજેતા જાહેર થયા છે,જ્યારે કોંગ્રેસ ૧૮ બેઠક પર વિજેતા થયું છે.જિલ્લા પંચાયતની ૧૨ બેઠક અન્ય પક્ષ અને વિપક્ષના ફાળે ગઈ છે.
રાજ્યની ૨૬૦ તાલુકા પંચાયતની ચૂંટણીમાં ૫૨૩૪ બેઠકના પરિણામો આવી રહ્યા છે,બપોર સુધીમાં ભાજપને ૮૫૨ બેઠક,કોંગ્રેસને ૧૮૭ બેઠક મળી છે,જ્યારે અન્ય પક્ષ અને અપક્ષને ૮૨ બેઠક મળી છે.
નગરપાલિકાના પરિણામોમાં ૮૪ નગરપાલિકાની કુલ ૨૬૨૪ બેઠકો પૈકી બપોર સુધીમાં જાહેર થયેલા પરિણામો અનુસાર ભાજપને ૧૦૭૪ બેઠક,કોંગ્રેસને ૧૭૨ બેઠક અને અન્ય પક્ષો અને અપક્ષને ૪૮ બેઠકો મળી છે.
રાજ્યમાં શાંતિપૂર્ણ વાતાવરણમાં મત ગણતરીની કામગીરી ચાલી રહી છે,ગણતરીના પ્રથમ ચાર કલાકમાં તમામ સંસ્થાઓમાં ભાજપનો દબદબો જોવા મળી રહ્યો છે. મોડી સાંજ સુધીમાં તમામ પરિણામો જાહેર થઈ જશે.
