એસબીઆઈ લોન કૌભાંડમાં વધુ ચારની ધરપકડ, કુલ આંક ૧૧ થયો

ભાવનગરમાં નિલમબાગ સ્ટેટ બેંક ઓફ ઈÂન્ડયાની શાખામાંથી પીએમઈજીપી યોજના અંતર્ગત લોન મેળવી લઈ અને તેનો હેતુ પાર નહીં પાડી પૈસાનું ગબન કરવાના કૌભાંડમાં સૌ પ્રથમ બે એજન્ટ અને ચાર મહિલા ગ્રાહકની ધરપકડ થઈ હતી. ત્યારબાદ આ કૌભાંડમાં બેંકના જ ચિફ મેનેજરની સંડોવણી ખુલતા પોલીસે તેની પણ ધરપકડ કરી હતી. હવે વધુ ચાર આરોપીની ધરપકડ કરાઈ છે જેમાં જે મહિલા ગ્રાહકો છે તેમના પતિ દેવોની ભૂમિકા હોવાનું ખુલતા જેલના સળિયા પાછળ ધકેલી દેવામાં આવ્યા છે.
ચકચારી બનેલા આ લોન કૌભાંડમાં આરોપીઓએ સબસીડી વાળી લોન મેળવી લઈ અને વેપાર ધંધા માટે જરૂરી સાધન સામગ્રી નહીં ખરીદી તેમજ ખોટા બીલો રજુ કરી ષડયંત્રને અંજામ આપ્યો છે. આથી નિલમબાગ પોલીસ દ્વારા ધીમી છતા મક્કમ ગતીએ તપાસ ચાલી રહી છે. થોડા દિવસ પૂર્વે આ કૌભાંડમાં નિલમબાગ એસબીઆઈના ચિફ મેનેજર સંતોષ કુમારની સંડોવણી ખુલતા તેની ધરપકડ કરી અને બે દિવસના રિમાન્ડ પણ મેળવાયા હતા. હાલ આરોપી જેલ હવાલે છે. ત્યા પોલીસે હવે મહિલા ગ્રાહકોના પતિઓની ધરપકડ કરી છે. પત્નીઓના નામે લોન મેળવી લઈ અને કૌભાંડમાં મુખ્ય ભૂમિકા પતિદેવોની હોવાનું પોલીસ તપાસમાં ખુલતા સિકંજા કસાયો છે. આગામી દિવસોમાં એસબીઆઈના વધુ કેટલાક અધિકારી, કર્મચારી સુધી તપાસનો દૌર લંબાવાની સંભાવના સુત્રોએ વ્યક્ત કરી છે.