મહુવા ગ્રામ્ય પોલીસ સ્ટેશન વિસ્તારના માઢિયા ગામે આવેલા ખાંભીવાળા પાંચાદાદાના મંદિરે ગત તા. ૨૦/૦૬/૨૦૨૬ના રોજ સાંજના સાતેક વાગ્યા દરમિયાન ચોરીની ઘટના બની હતી. જેમાં કોઈ અજાણ્યો ચોર ઇસમ પથ્થરની ખાંભી ઉપર ચડાવેલા ચાંદીના પંચધાતુ વાળા અને જેના પર સોનાનો ઢોળ ચડાવેલો હતો તેવા ૧૦ નંગ છતર કુલ વજન આશરે ૨૦૦ ગ્રામ, કિંમત રૂપિયા ૮૦૦૦ ચોરી કરી નાસી છૂટ્યો હતો.
જે સંદર્ભે મહુવા ગ્રામ્ય પોલીસ સ્ટેશનમાં BNS કલમ ૩૦૫(ડી) મુજબ ગુન્હો નોંધવામાં આવ્યો હતો. આ ગુન્હાને ગણતરીના કલાકોમાં ઉકેલી નાખવા માટે મહુવા ગ્રામ્ય પોલીસ તેમજ લોકલ ક્રાઈમ બ્રાન્ચની સંયુક્ત ટીમ દ્વારા તપાસ હાથ ધરવામાં આવી હતી, જેમાં ઓરીજનલ મુદ્દામાલ સાથે આરોપીને શોધી કાઢી ધોરણસર અટકાયત કરવામાં આવી છે. પકડાયેલા આરોપીનું નામ દીપકભાઈ ઉર્ફે દીપો દેવજીભાઈ પરમાર (ઉંમર વર્ષ ૩૩, ધંધો- હીરાઘસુ, રહેવાસી- રાભડા ગામ, ખોડીયાર મંદિર સામે, તાલુકો- લાઠી, જિલ્લો- અમરેલી) છે. પોલીસે આરોપી પાસેથી ચોરી થયેલા સોનાના ઢોળવાળા તમામ ૧૦ નંગ છતર કબજે લીધા છે. આ સફળ કામગીરી કરનાર ટીમમાં પોલીસ સબ ઇન્સ્પેક્ટર એસ.એ.ઝાલા, LCB એ.એસ.આઇ. ડી.કે.આહીર, હેડ કોન્સ્ટેબલ વી.પી.ગોહીલ, હેડ કોન્સ્ટેબલ બી.આર.મકવાણા, LCB પોલીસ કોન્સ્ટેબલ રાજુભાઈ ગોવિંદભાઈ વાઘેલા તથા પોલીસ કોન્સ્ટેબલ અશ્વિનભાઈ પ્રેમજીભાઈ જીંજાળા જોડાયા હતા.
