ભાવનગર શહેરમાં નામાંકિત કોમ્પ્યુટર અને કોચિંગ ક્લાસ પર સ્ટેટ જીએસટીના દરોડા પડ્યાને હજી એક સપ્તાહ માંડ થયું છે ત્યાં જીએસટી વિભાગે ડિવિઝનના ત્રણેય જિલ્લાઓમાં વધુ એક મોટાપાયે સર્ચ ઓપરેશન હાથ ધરીને વેપારી આલમમાં ફફડાટ ફેલાવી દીધો છે. સૂત્રો પાસેથી મળતી વિગતો અનુસાર, સ્ટેટ જીએસટી વિભાગની જુદી-જુદી ટીમો દ્વારા સોમવારે ઉઘડતી બજારે જ ભાવનગર, અમરેલી અને બોટાદ જિલ્લાની કુલ ૯ પેઢીઓના ૧૦ સ્થળોએ એકસાથે દરોડાની કામગીરી આરંભવામાં આવી હતી, જે આજે બીજા દિવસે પણ મોટાભાગના સ્થળોએ યથાવત હોવાનું જાણવા મળ્યું છે.
આ મેગા ઓપરેશન દરમિયાન ભાવનગર શહેરના જાણીતા પંડયા મિઠાઈવાળા, રોલીપોલી કેક શોપ, કાપડના વેપારી નાઈસ એન્ડ ન્યુ ફેશન, ગણેશ સ્ટોર તથા ડ્રાઈફ્રુટના વેપારી અરૃણકુમાર ભુપતરાય ઠક્કર મળીને કુલ ૬ સ્થળોએ તપાસનો દોર ચલાવાયો હતો. આ ઉપરાંત બોટાદમાં આવેલી પુજન ફુડ્ઝ તેમજ અમરેલીમાં હાર્દિક મેડિકો અને પીવીસી પાઈપ તથા પાણીની ટાંકીના વિક્રેતા ગણેશ એન્ટરપ્રાઈઝ પર પણ ત્રાટકવામાં આવ્યું હતું. આ સાથે જ વડિયા-કુકાવાવ ખાતે આવેલી સરદાર બીજ નિગમ નામની બિયારણની પેઢીમાં પણ તપાસ શરૂ કરાઈ હતી.
જીએસટી વિભાગની પ્રાથમિક તપાસમાં બહાર આવ્યું છે કે આ તમામ પેઢીઓ વાર્ષિક રૂ. દોઢ કરોડ કરતા વધારેનું ટર્નઓવર ધરાવતી હોવા છતાં, ચોપડે ઓછું ટર્નઓવર બતાવીને કંપોઝિટ સ્કીમની શરતોનો સરેઆમ ભંગ કરી ગેરરીતિ આચરતી હતી. કાયદાની વિરુદ્ધ જઈને ટેક્સ ચોરી કરતા મીઠાઈ, કેક, કપડા, ડ્રાઈફ્રુટ, મેડિસિન, પીવીસી પાઈપ અને બિયારણના આ વેપારીઓને ત્યાં સોમવારે શરૂ થયેલી તપાસ મોડી રાત સુધી ચાલી હતી. સર્ચ ઓપરેશન દરમિયાન અધિકારીઓએ કેટલીક જગ્યાએથી શંકાસ્પદ ડિજિટલ અને ફિઝિકલ ડેટા તેમજ હિસાબી સાહિત્ય કબજે કરીને આગળની તપાસ હાથ ધરી છે અને હજુ પણ આ તપાસ વધુ લંબાય તેવી સંભાવના સેવાઈ રહી છે.
