ભાવનગર જિલ્લામાં અલગ અલગ જગ્યાએથી પોલીસ દ્વારા બિન અધિકૃત કફ સીરપના જથ્થા સાથે વિતરણ કરતા શખ્સોને ઝડપી પાડયાના બનાવો હજુ તાજા છે ત્યારે સિહોર પોલીસ અને એસઓજીની સંયુક્ત રેડ દરમિયાન વધુ એક સિહોર તાલુકાના ભાણગઢ ગામેથી કફ સીરપના જથ્થા સાથે એક શખ્સને ઝડપી લીધો હતો.
સિહોર પોલીસ સ્ટેશનના સ્ટાફ અને એસઓજી સ્ટાફ દ્વારા પેટ્રોલિંગ દરમિયાન બાતમીના આધારે સિહોર પાસેના ભાણગઢ ગામે બજરંગદાસ બાપાની મઢુલી પાસે હસમુખ ગોપાલભાઈ પરમારના કબજામાંથી બિન અધિકૃત કફ સીરપની ૧૮૪ બોટલો (કિ.રૂ. ૩૬૪૩૨) અને એક મોબાઇલ (કિ.રૂ.૫૦૦૦) મળી કુલ રૂપિયા ૪૧૪૩૨ના મુદ્દામાલ સાથે હસમુખભાઇની અટક કરેલ છે. આ અંગે વધુ પુછપરછ કરતાં તેઓએ આ બોટલો નાગજી કાનજીભાઇ ચુડાસમા પાસેથી વેચાણ કરવાના હેતુથી ખરીદી હોવાનું જણાવેલ.આ બનાવ અંગે સિહોર પોલીસે બંને વિરૂધ્ધ એન.ડી.પી.એકટની કલમ ૮ સી, ૨૧ સી, ૨૯ મુજબ ગુનો નોંધી આગળની તપાસ હાથ ધરી છે.
