જિલ્લામાં દેશી દારૂ અને અસામાજિક પ્રવૃત્તિઓ પર કડક અંકુશ લાવવા માટે ઉચ્ચ પોલીસ અધિકારીઓની સૂચનાથી અલંગ પોલીસે મોટી કાર્યવાહી હાથ ધરી છે. દેશી દારૂની ગેરકાયદેસર પ્રવૃત્તિઓમાં સતત સંડોવાયેલા ત્રણ શખ્સોની પાસા (PASA) હેઠળ અટકાયત કરી તેમને રાજ્યની વિવિધ જેલોમાં મોકલી આપવામાં આવ્યા છે.
ભાવનગર રેન્જ આઈ.જી. આર.વી. અસારી, એસ.પી. નિતેશ પાંડેય અને તળાજા ડીવાયએસપી એમ.બી. નકુમના માર્ગદર્શન હેઠળ અલંગ પોલીસ સ્ટેશનના પી.આઈ. પી.એમ. દેસાઈએ આ બુટલેગરો વિરુદ્ધ પાસાની દરખાસ્ત તૈયાર કરી હતી. જિલ્લા મેજિસ્ટ્રેટ દ્વારા આ દરખાસ્ત મંજૂર કરવામાં આવતા તાત્કાલિક પાસા વોરંટની બજવણી કરવામાં આવી હતી.
પોલીસે ત્રણેય ઈસમો હાર્દિકસિંહ લીલુભા ગોહિલ ઉ.વ. ૨૬, રહે.નવાગામ-નાના, તા. ઘોઘાની અટકાયત કરી ખાસ જેલ, ભુજ ખાતે, મનદીપસિંહ લીલુભા ગોહિલ ઉ.વ. ૨૬, રહે. નવાગામ-નાના, તા.ઘોઘા વાળને મધ્યસ્થ જેલ, રાજકોટ તેમજ સુનીલ ઉર્ફે છનો મનુભાઇ વાઘેલા ઉ.વ. ૨૫, રહે.રાજપરા નં.૦૨, તા. તળાજા વાળની અટકાયત કરીને મધ્યસ્થ જેલ, સાબરમતી (અમદાવાદ) ખાતે જેલહવાલે કરવામાં આવ્યા છે.
