ભાવનગર એલ.સી.બી. પોલીસ ટીમે નાઈટ પેટ્રોલીંગ દરમિયાન મળેલી બાતમીના આધારે ભાવનગર શહેરના ટોળકીનગર વિસ્તારમાં દરોડો પાડ્યો હતો. આ કાર્યવાહીમાં જાહેરમાં હાથકાંપનો જુગાર રમી રહેલા ૩ શખ્સો રંગે હાથે ઝડપાઈ ગયા હતા, જ્યારે પોલીસને જોઈને અન્ય ૩ ઈસમો નાસી છૂટવામાં સફળ રહ્યા હતા.
બનાવ અંગે જાણવા મળતી વિગતો મુજબ ભાવનગર એલ.સી.બી. સ્ટાફના માણસો સિટી વિસ્તારમાં નાઈટ પેટ્રોલીંગમાં હતા. તે દરમિયાન ટીમને બાતમી મળી હતી કે, વિમાના દવાખાના સામે, ટોળકીનગર, રેવાબેન મકવાણાના ઘરની બહાર સ્ટ્રીટ લાઈટના અંજવાળે કેટલાક શખ્સો જાહેરમાં ગંજીપાના વડે જુગાર રમી રહ્યા છે. બાતમીના આધારે પંચોને સાથે રાખી પોલીસે સ્થળ પર રેડ કરી જેમાં કેટલાક શખ્સો જુગાર રમી રહ્યા હતા તેમાંથી પોલીસને જોઈ ત્રણ શખ્સો નાસી ગયા હતા.અને અશ્વિન અરવિંદભાઈ સોલંકી ઉ.વ.૨૫, રહે. કરચલીયા પરા, ભાવનગર, અનીલ જીવરાજભાઈ મકવાણા ઉ.વ.૪૪, રહે. બ્રાહ્મણ તલાવડી, ભાવનગર તથા વિપુલ ઉર્ફે ધોની શંકરભાઈ મકવાણા ઉ.વ.૪૦, રહે. ટોળકીનગર, ભાવનગર વાળો ઝડપાઇ ગયા હતા. પોલીસે ત્રણેયની અટકાયત કરી કુલ રૂપિયા ૧૧,૭૦૦/- ની રોકડ રકમ જપ્ત કરી હતી. હાજર મળી આવેલ ૩ અને નાસી ગયેલ રાહુલ ઉર્ફે ગીટી રમેશભાઈ બારૈયા રહે. બ્રાહ્મણ તલાવડી, ભાવનગર, વિનોદ ઉર્ફે બાદશાહ રહે. વિમાના દવાખાના પાસે, ભાવનગર તથા જરમન શરદભાઈ સોલંકી રહે. બ્રાહ્મણ તલાવડી, ભાવનગર મળી કુલ ૬ ઈસમો વિરુદ્ધ જુગાર ધારાની કલમ ૧૨ મુજબ ગુનો નોંધી ધોરણસરની કાર્યવાહી હાથ ધરી છે.
