અમેરિકાના મિયામી ઇન્ટરનેશનલ એરપોર્ટ પર રવિવારે એક બોઇંગ કાર્ગો પ્લેન લેન્ડિંગ પછી રનવે પરથી બહાર નીકળી ગયું.આ દરમિયાન પ્લેન ઘણી ગાડીઓ સાથે અથડાયું અને તેમાં ભીષણ આગ લાગી ગઈ. અકસ્માતમાં ઓછામાં ઓછા 5 લોકોના મોત થયા, જ્યારે અન્ય 5 ઘાયલ થયા છે. તેમાંથી 3ની હાલત ગંભીર છે. CNNના રિપોર્ટ અનુસાર અકસ્માત સ્થાનિક સમય અનુસાર રવિવારે બપોરે લગભગ 2 વાગ્યે થયો. આ પ્લેન એમેઝોનના પ્રાઇમ એર નેટવર્ક માટે સંચાલિત થઈ રહ્યું હતું.
વિમાન પ્યુર્ટો રિકોના લુઈસ મુનોઝ મારિન ઇન્ટરનેશનલ એરપોર્ટ પરથી ઉડાન ભરીને મિયામી પહોંચ્યું હતું. વિમાનની ઝપેટમાં આવેલી ઘણી ગાડીઓમાં લોકો ફસાઈ ગયા હતા. તે જ સમયે, વિમાનના પાયલટ અને કો-પાયલટ પણ કોકપિટમાં ફસાયેલા હતા. મિયામી-ડેડ ફાયર રેસ્ક્યુની 60 થી વધુ યુનિટ ઘટનાસ્થળે પહોંચી. લગભગ 200 થી વધુ ઇમરજન્સી કર્મચારીઓને બચાવ અભિયાનમાં લગાવવામાં આવ્યા. ટીમોએ ખાસ ફોમની મદદથી વિમાનમાં લાગેલી આગ બુઝાવી અને ફસાયેલા લોકોને બહાર કાઢ્યા. દુર્ઘટનાના ઘણા કલાકો પછી પણ વિમાનમાંથી ઇંધણ લીકેજની સમસ્યા ચાલુ રહી હતી.
32 વર્ષ જૂનું હતું કાર્ગો વિમાન
આ વિમાન 32 વર્ષ જૂનું બોઇંગ 767 હતું. FAAના ડેટા અનુસાર તે રનવે 30 પર ઉતર્યું હતું, જે 9000 ફીટથી વધુ લાંબો છે. 21 એર એક કાર્ગો કેરિયર છે જેનું ઓપરેશન સેન્ટર મિયામીમાં છે, જે બોઇંગ 767 વિમાનોનો ઉપયોગ કરે છે.
એમેઝોનના પ્રવક્તા કેલી નેન્ટેલે X પર એક નિવેદન બહાર પાડ્યું, “અમે પુષ્ટિ કરી શકીએ છીએ કે 21 એર દ્વારા સંચાલિત એમેઝોન એરનું એક વિમાન આજે મિયામી ઇન્ટરનેશનલ એરપોર્ટ પર લેન્ડિંગના પ્રયાસ દરમિયાન એક ઘટનાનો ભોગ બન્યું. અમે હજુ પણ માહિતી એકત્રિત કરી રહ્યા છીએ અને ખરેખર શું થયું તે સમજવાનો પ્રયાસ કરી રહ્યા છીએ.”
