વડાપ્રધાન નરેન્દ્ર મોદીના વડોદરા આગમન પૂર્વે કાર્યક્રમ સ્થળે દેશભક્તિનો માહોલ જોવા મળ્યો હતો. ઉરી સર્જિકલ સ્ટ્રાઇકની થીમ આધારિત નાટક અને નૃત્યની રજૂઆત કરવામાં આવી હતી. કલાકારોએ પોતાના અભિનય અને નૃત્ય દ્વારા દેશભક્તિનો સંદેશ આપતા ઉપસ્થિત લોકોમાં જોશ અને જોમ ભરાયો હતો.
નાટક અને નૃત્યની રજૂઆત દરમિયાન કાર્યક્રમ સ્થળે મોટી સંખ્યામાં લોકો ઉપસ્થિત રહ્યા હતા. દેશભક્તિના ગીતો અને રજૂઆતો વચ્ચે લોકોમાં ભારે ઉત્સાહ જોવા મળ્યો હતો.રજૂઆત દરમિયાન ઉપસ્થિત લોકો દ્વારા ‘ભારત માતા કી જય’ અને ‘વંદે માતરમ્’ના નારા લગાવવામાં આવ્યા હતા. નારાઓથી સમગ્ર કાર્યક્રમ સ્થળ ગૂંજી ઉઠ્યું હતું. યુવાઓ સહિત ઉપસ્થિત લોકોમાં દેશભક્તિનો ઉત્સાહ જોવા મળ્યો હતો. વડાપ્રધાનના આગમન પૂર્વે યોજાયેલા સાંસ્કૃતિક કાર્યક્રમોમાં ઉરી સર્જિકલ સ્ટ્રાઇકની થીમ આધારિત રજૂઆત આકર્ષણનું કેન્દ્ર બની હતી.
વડાપ્રધાન નરેન્દ્ર મોદી આજે વડોદરાની મુલાકાતે આવી રહ્યા છે. વડાપ્રધાન દ્વારા વડોદરામાં રૂ.35 હજાર કરોડથી વધુના વિકાસકાર્યોનું શિલાન્યાસ, ઉદ્ઘાટન અને રાષ્ટ્રને સમર્પણ કરવામાં આવશે. વેસ્ટર્ન ડેડિકેટેડ ફ્રેટ કોરિડોરના ત્રણ મુખ્ય વિભાગો રાષ્ટ્રને સમર્પિત કરવામાં આવશે, જે આ મહત્વપૂર્ણ પ્રોજેક્ટ પૂર્ણ થવાનું ચિહ્નિત કરશે. આ ઉપરાંત રેલવેના ત્રણ અને હાઇવેના ત્રણ પ્રોજેક્ટનું શિલાન્યાસ કરવામાં આવશે. વડાપ્રધાનની મુલાકાતને લઈને વડોદરા શહેરને શણગારવામાં આવ્યું છે. શહેરના વિવિધ વિસ્તારોમાં વડાપ્રધાનના મોટા હોર્ડિંગ્સ લગાવવામાં આવ્યા છે. રંગરોગાન, લાઈટિંગ સહિતની વ્યવસ્થાઓ કરવામાં આવી છે. બીજી તરફ વડાપ્રધાનના આગમન પૂર્વે જ કાર્યક્રમ સ્થળે મોટી સંખ્યામાં લોકો ઉમટી પડ્યા છે.
વડાપ્રધાનના આગમન પૂર્વે કાર્યક્રમ સ્થળે ઢોલ, ગરબા અને નૃત્ય સહિતના કાર્યક્રમો યોજાઈ રહ્યા છે. સવારથી જ લોકો કાર્યક્રમ સ્થળે પહોંચવા લાગ્યા હતા અને ડોમ હાઉસફૂલ થઈ ગયો હતો. વડાપ્રધાન નરેન્દ્ર મોદીની રાહ જોવાઈ રહી છે અને સ્થળ પર ભારે ઉત્સાહ જોવા મળી રહ્યો છે. ખાસ કરીને ઝેન-જીના યુવાઓમાં પણ ભારે ઉત્સાહ જોવા મળ્યો હતો. કેટલાક યુવાઓ વડાપ્રધાનને આપવા માટે તેમના ફોટા, ચિત્રો સહિતની ભેટ લઈને પહોંચ્યા હતા. ગરબામાં યુવાનો સાથે સાંસદો અને ધારાસભ્યો પણ જોડાયા હતા.
