રાજસ્થાનમાં હોર્સ ટ્રેડિંગના ડરથી 10 હજાર વિજેતાને હોટેલમાં બંધ કરાયા

રાજસ્થાનમાં મ્યુનિ. કોર્પોરેશન, નગર પંચાયતની ચૂંટણીઓ યોજાઇ હતી, જેના પરિણામો જાહેર થયા બાદ હવે હોર્સ ટ્રેડિંગના મામલા સામે આવી રહ્યા છે. એવામાં આશરે ૧૦ હજાર જેટલા વિજેતા ઉમેદવારોને હાલ હોટેલો અને રિસોર્ટમાં બંધ રખાયા છે. જ્યારે કેટલાક ઉમેદવારને તો માત્ર એક જ મત મળ્યો છે તેની પણ હાલ ભારે ચર્ચા ચાલી રહી છે.
રાજસ્થાનના અજમેર, અલવર, ભરતપુર, બિકાનેર, જયપુર, જોધપુર, કોટા, પાલી, ઉદયપુર સહિતના કોર્પોરેશનમાં ચૂંટણીઓ યોજાઇ હતી. ચંૂટણી પરિણામો સોમવારે જાહેર કરવામાં આવ્યા હતા. જે બાદથી જ કોંગ્રેસ, ભાજપ, અપક્ષ સહિતના આશરે દસ હજાર કરતા વધુ વિજેતા ઉમેદવારો કે કાઉન્સેલર્સ વિવિધ હોટેલો અને રિસોર્ટમાં અલગ અલગ જગ્યાએ બંધ છે. જનતાએ આ નેતાઓ પર ભરોસો કરીને તેમને મત આપ્યા છે જોકે ભાજપ, કોંગ્રેસને પોતાના જ આ નેતાઓ પર ભરોલો નથી તેથી તેમને અન્ય જગ્યાએ લઇ જવામાં આવ્યા છે.પરિસ્થિતિ એટલી કફોડી છે કે જેવી ચૂંટણી પૂર્ણ થઇ અને પરિણામો જાહેર થયા કે તે સાથે જ વિજેતા ઉમેદવારોના મોબાઇલ લઇ લેવામાં આવ્યા અને તેમને સીધા હોટેલ કે રિસોર્ટમાં પહોંચાડી દેવામાં આવ્યા હતા. એટલુ જ નહીં કાઉન્ટિંગ બાદ તેમને વિજેતા જાહેર થયાનું સર્ટિફિકેટ લેવા માટે પણ નહોતા જવા દેવાયા. એજન્ટો દ્વારા આ સર્ટિફિકેટ લેવામા આવ્યા હતા. રાજસ્થાનમાં હાલ ભાજપની સરકાર છે એવામાં આ ચૂંટણીમાં એક બેઠકના પરિણામ ભારે ચર્ચામાં છે કેમ કે ભાજપના એક ઉમેદવારને માત્ર એક જ મત મળ્યો છે.