તેલંગાણાના ખમ્મમ જિલ્લામાં પૂરના પાણીમાં ફસાયેલા માછીમારોને બચાવવાની કામગીરી દરમિયાન એક મોટી દુર્ઘટના બની હોવાનું પ્રકાશમાં આવ્યું છે. અહીં બુધવારે સાંજે બેથુપલ્લી તળાવ ખાતે બચાવ કામગીરી ચાલી રહી હતી ત્યારે પાણીના તેજ પ્રવાહને કારણે બે હોડીઓ પલટી ગઈ હતી. ચોંકાવનારી વાત એ છે કે, બોટ પલટી જતા માછીમારોને બચાવવા ગયેલા SDRF અને ફાયર સર્વિસ વિભાગના કુલ 11 જવાનો ગુમ થઈ ગયા છે. જેમની અત્યારે શોધખોળ ચાલી રહી છે.
સૂત્રોના જણાવ્યાં પ્રમાણે દુર્ઘટના સર્જાઈ તે વખતે આ ટીમ દ્વારા પાંચ માછીમારોને સુરક્ષિત રીતે બહાર કાઢવાનો પ્રયત્ન કરવામાં આવી રહ્યો હતો. પરંતુ બચાવવા ગયેલી બોટ પલટી ગઈ હતી. આ સમગ્ર મામલે જાણ થતાની સાથે જ જિલ્લા તંત્ર દ્વારા લાપતા જવાનોની શોધખોળ શરૂ કરવા માટે રેસ્ક્યૂ આપરેશન શરૂ કરી દીધું છે. લાપતા જવાનોને શોધવા માટે કોથાગુડેમથી SDRFના 6 જવાનો અને ફાયર વિભાગના અન્ય 4 કર્મચારીઓને બોલાવવામાં આવ્યા છે, જેમાં બે સ્થાનિક તરવૈયા પણ સામેલ થયાં છે.
લાપતા થયેલા જવાનોને શોધવા માટે ભદ્રાચલમથી NDRF ની ટીમને બોલાવવામાં આવી છે. આ સાથે બચાવ ટીમ દ્વારા અન્ય બોટની મદદથી પણ સર્ચ ઓપરેશન ચલાવવામાં આવી રહ્યું છે. આ સાથે પાણીમાં ફસેયાલા લોકો માટે ડ્રોન દ્વારા લાઈફ જેટેક પહોંચાવવામાં આવી રહ્યાં છે. આ સમગ્ર મામલે વાત કરતા મહેસૂલ મંત્રી પોંગુલેટી શ્રીનિવાસ રેડ્ડીએ એક્સ પર પોસ્ટ કરતા જણાવ્યું કે બચાવ ટીમોએ ગુમ થયેલા SDRF જવાનોના સંભવિત સ્થાનની ઓળખ કરી લીધી છે. હવે તેમના સુધી પહોંચવાની કામગીરી શરૂ કરી દેવામાં આવી છે.
—————————-
