અમેરિકામાં ૩૦ વર્ષ સુધી લેબર વકીલ તરીકે વકીલાત કર્યા પછી સેવાનિવૃત્ત થઇ ભારત પરત ફરેલા ૬૨ વર્ષીય અતુલ તલવારે સાયબર છેતરપિંડી કરનારાઓની જાળમાં ફસાઇ પોતાની સમગ્ર જીવનની જમા રકમ ગુમાવી દીધી છે.પોતાને સીબીઆઇ અને એનએઆઇનાં અધિકારી બતાવનારા ઠગોએ તેમને ૧૫ દિવસ સુધી ડિજિટલ એરેસ્ટ રાખ્યા હતાં. પહલગામ આતંકી હુમલાથી સંબધ હોવાનો ડર બતાવીને તેમની પાસેથી ૩.૮૦ કરોડ આંચકી લીધા હતાં.
પીડિતે નોઇડા પોલીસ અને અમેરિકન તપાસ એજન્સી એફબીઆઇમાં પણ ફરિયાદ નોંધાવી છે. અતુલ તલવાર વર્ષ ૧૯૮૨માં માત્ર ૧૮ વર્ષની ઉંમરમાં દિલ્હીથી ન્યૂયોર્ક ગયા હતાં. તે ચાલુ વર્ષનાં સપ્ટેમ્બરમાં સેવાનિવૃત્ત થઇને ભારત પરત ફર્યા હતાં. તેમની યોજના જાન્યુઆરી સુધી નોઇડા સ્થિત પોતાની સ્વર્ગસ્થ માતાનાં ઘરનું નવીનિકરણ કરી ત્યાં જ રહેવાની હતી. ઘટનાની શરૂઆત ૧૬ ઓક્ટોબરે થઇ જ્યારે તેમના પર એક ફોન આવ્યો હતો. ફોન કરનારે પોતાને મુંબઇનાં કોલાબા પોલીસ સ્ટેશનનાં પોલીસકર્મી બતાવી દાવો કર્યો હતો કે તેમનો આધારકાર્ડ પહલગામ આતંકી હુમલા સાથે સંકળાયેલો છે. પોલીસકર્મીએ જણાવ્યું હતું કે તેમના નામથી ખોલવામાં આવેલા કેનેરા બેંકનાં ખાતામાંથી આંતકીઓને ૫૩ કરોડ રૂપિયા મોકલવામાં આવ્યા છે અને તેના બદલામાં તેમને ૫ કરોડ રૂપિયા કમિશન મળ્યું છે. પોતાને નિર્દોષ સાબિત કરવાનાં નામે છેતરપિંડી આચરનારાઓએ અતુલ તલવારને તેમની ૯૮ ટકા સંપત્તિને આરબીઆઇથી વેરિફાય કરવાનું જણાવ્યું હતું.





