આંતરરાષ્ટ્રીય સ્તરે કાચા તેલની કિંમતોમાં ઘટાડો જોવા મળ્યો છે. આ દરમિયાન સરકારે આંતરરાષ્ટ્રીય દરોમાં ઘટાડા સાથે દેશમાં ઉત્પાદિત કાચા તેલ પર વિન્ડફોલ ટેક્સમાં ઘટાડો કર્યો છે.
દેશમાં પેટ્રોલ-ડીઝલના ભાવ લાંબા સમયથી સ્થિર છે. તેમાં કોઈ પણ પ્રકારનો ફેરફાર કરવામાં આવ્યો નથી. છેલ્લા ઘણા મહિનાઓથી પેટ્રોલ-ડીઝલના ભાવમાં ન તો વધારો થયો છે કે ન તો ઘટાડો થયો છે. જો કે બીજી તરફ આંતરરાષ્ટ્રીય સ્તરે કાચા તેલની કિંમતોમાં ઘટાડો જોવા મળ્યો છે. આ દરમિયાન સરકારે આંતરરાષ્ટ્રીય દરોમાં ઘટાડા સાથે દેશમાં ઉત્પાદિત કાચા તેલ પર વિન્ડફોલ ટેક્સમાં ઘટાડો કર્યો છે. સાથે જ ડીઝલ અને એરક્રાફ્ટ ફ્યુઅલની નિકાસ પર પણ ડ્યૂટી ઘટાડી દેવામાં આવી છે.
પાંચમા પખવાડિયાની સમીક્ષામાં સરકારે સ્થાનિક સ્તરે ઉત્પાદિત ક્રૂડ ઓઇલ પરનો ટેક્સ 13,300 રૂપિયા પ્રતિ ટનથી ઘટાડીને 10,500 રૂપિયા પ્રતિ ટન કરી દીધો છે. નાણા મંત્રાલયના નોટિફિકેશન મુજબ ડીઝલની નિકાસ પર ડ્યૂટી 13.5 રૂપિયા પ્રતિ લીટરથી ઘટાડીને 10 રૂપિયા પ્રતિ લીટર કરી દેવામાં આવી છે.
આ ટેક્સ ભારતમાંથી નિકાસ કરવામાં આવતા તેલ પર લાગે છે, તેનાથી રિફાઈનરીને પણ ફાયદો થશે. સરકારે આ વર્ષે જુલાઈથી ભારતમાંથી નિકાસ કરવામાં આવતા પેટ્રોલ, ડીઝલ અને એટીએફ પર વિન્ડફોલ ટેક્સ લગાવ્યો હતો. એરક્રાફ્ટ ફ્યૂલ એક્સપોર્ટ પર ડ્યૂટી 9 રૂપિયા પ્રતિ લીટરથી ઘટાડીને 5 રૂપિયા પ્રતિ લીટર કરી દેવામાં આવી છે. નવા દરો 17 સપ્ટેમ્બરથી અમલમાં આવશે. આંતરરાષ્ટ્રીય બજારમાં કાચા તેલની કિંમતો છ મહિનાના નીચલા સ્તર પર આવી ગઈ છે. આ કારણે વિન્ડફોલ પ્રોફિટ ટેક્સમાં ઘટાડો થયો છે.
