ફિલ્મની વાર્તાને ટક્કર મારે તેવી લૂંટ, હાઇવે પર કારમાંથી 55 લાખ લઇ ચોર ફરાર

દિવાળી નજીક આવતાની સાથે જ સુરતમાં લૂંટની ઘટનાઓ સામે આવવાની શરૂઆત થઈ ચૂકી છે. સુરતનો કાપડ વેપારી ડીંડોલીથી ચલથાન તરફ કેનલ રોડ પરથી હાઇવે ઉપર જઈ રહ્યો હતો ત્યારે મોટરસાયકલ પર આવેલા ઈસમોએ ગાડી ઉપર કીચડ ફેંક્યા બાદ વેપારીએ ગાડી ઉભી રાખી હતી. આ ઇસમોએ વેપારીની ગાડીમાં રહેલા 55 લાખ રૂપિયાની બેગ લઈ ફરાર થઈ ગયા હતા. આ મામલાની જાણકારી વેપારીએ પોલીસને આપતા પોલીસના ઉચ્ચ અધિકારીઓ ઘટના સ્થળે પહોંચીને તપાસનો ધમધમાટ શરૂ કર્યો હતો.
પોતાના ધંધાકીય કામ માટે પોતાના બે મિત્રો સાથે રૂપિયા 55 લાખ લઈને મોડી સાંજે વેપારી ડીંડોલી ચલથાણ કેનાલ હાઈવે પરથી કડોદરા તરફ જઈ રહ્યા હતા. આ દરમિયાન ડીંડોલીથી થોડીક જ દૂર બે અજાણ્યા ઈસમો મોટરસાયકલ પર તેનો પીછો કરી ડ્રાઇવરના કાચ ઉપર કીચડ ફેંક્યો હતો. જેથી કાર ચાલકે ગાડીને સાઈડ ઉપર ઉભી રાખી હતી. તે સમયે આ ઈસમો વેપારીની ગાડીમાં રહેલા 55 લાખની બેગ તેની નજર ચૂકવીને લઈને ફરાર થઈ ગયા હતા. જોકે પોતે લૂંટાયા હોવાની જાણકારી મળતા જ વેપારીએ તાત્કાલિક આ બાબતે પોલીસને જાણ કરી હતી. ડીંડોલી પોલીસના સ્ટાફ સાથે ક્રાઈમ બ્રાન્ચ અને ઉચ્ચ અધિકારીઓ તાત્કાલિક ઘટના દોડી આવ્યા હતા અને આ મામલે તપાસ શરૂ કરી હતી.