ટ્વિટરના માલિક બન્યા પછી એલન મસ્ક આ માઇક્રો-બ્લોગિંગ સાઇટમાં સતત નવા ફેરફારો કરીને તેના વપરાશકર્તાઓને આશ્ચર્યચકિત કરી રહ્યા છે. એક અહેવાલ મુજબ એલન મસ્કે હવે $8 બ્લુ ટિક સબ્સ્ક્રિપ્શન અનુપલબ્ધ કરી દીધું છે. ટ્વિટરે તેના iOS વપરાશકર્તાઓ માટે આ સેવા શરૂ કરી જેથી તેઓ પેઇડ સેવા દ્વારા તેમની પ્રોફાઇલ પર બ્લુ ટિક વેરિફિકેશન મેળવી શકે.
જોકે એક રિપોર્ટ અનુસાર આ વિકલ્પ જે પહેલા Twitterની iOS એપમાં ઉપલબ્ધ હતો તે હવે દેખાતો નથી. જેને લઈ એક યુઝર્સે ફરિયાદ કરી છે કે, આ ફીચર હવે ઉપલબ્ધ નથી. બ્લુ ટિક માટે અરજી કરવા પર એક ભૂલ સંદેશ મળી મંલિ રહ્યો છે. ” જેમાં લખ્યું છે. “તમારી રુચિ બદલ આભાર, Twitter બ્લુ ભવિષ્યમાં તમારા દેશમાં અનુપલબ્ધ રહેશે. કૃપા કરીને પછીથી ફરી તપાસો.”
તાજેતરમાં ટ્વિટરના નવા સબ્સ્ક્રિપ્શન પ્રોગ્રામને લેવા માટે યુએસ અને અન્ય દેશોમાં તેની કિંમત $7.99 રાખવામાં આવી હતી, જેમાં વધારાની સુવિધાઓ સાથે ટ્વિટર પર બ્લુ ટિક અથવા બેજ આપવામાં આવી રહ્યા હતા. જોકે હવે ટ્વિટર પરથી બ્લુ ટિક વેરિફિકેશનનો વિકલ્પ અચાનક ગાયબ થઈ ગયો છે. રિપોર્ટ અનુસાર કંપનીએ આ નિર્ણય ઘણી ફેમસ બ્રાન્ડ્સ અને સેલિબ્રિટીઝના ફેક એકાઉન્ટમાં વધારાને કારણે લીધો છે.
નોંધનીય છે કે, પહેલા ટ્વિટર પર યુઝર્સને ઓળખ વેરિફિકેશન પછી બ્લુ ટિક મળતું હતું. પરંતુ હવે અમેરિકા સહિત કેટલાક દેશોમાં યુઝર્સ પૈસા ચૂકવીને બ્લુ ટિક ખરીદી શકે છે. બુધવારે ટ્વિટરે આ સેવા શરૂ કરી છે. આ પછી યુઝર્સે આ સુવિધાનો દુરુપયોગ શરૂ કરી દીધો. આવી સ્થિતિમાં ટ્વિટર પર બ્લુ ટિકવાળા નકલી એકાઉન્ટ્સનું જાણે કે પૂર આવ્યું. વેરિફાઈડ એકાઉન્ટમાંથી ફેક ટ્વીટ્સ પણ આવવાનું શરૂ થઈ ગયું હતું, ત્યારબાદ ટ્વિટરે પેઈડ સર્વિસનો નિર્ણય હાલ પૂરતો અનુપલબ્ધ કર્યો છે.
આ તરફ હવે આ મામલે એલન મસ્કે કહ્યું છે કે, પ્રખ્યાત બ્રાન્ડ અથવા વ્યક્તિત્વના નામે ચાલતા ટ્વિટર એકાઉન્ટ જ્યાં સુધી તેને પેરોડી એકાઉન્ટ તરીકે જાહેર ન કરે ત્યાં સુધી તેને નિષ્ક્રિય કરવામાં આવશે.
