ભાવનગર શહેરની બે બેઠક પૈકી પૂર્વની બેઠકમાં ભાજપએ કોકડું ઉકેલીને તેમના ઉમેદવાર પદે સેજલબેન રાજીવભાઈ પંડ્યાના નામની જાહેરાત કરી છે ત્યારે આખરે હવે કોંગ્રેસે પોતાનું પાનું ઉતરવાનો સમય આવી ગયો છે. ભાજપના ઉમેદવારની જાહેરાતની રાહ જોઈને કોંગ્રેસે પોતાનો ઉમેદવારની જાહેરાત કરી ન હતી જે ચૂંટણીનો વ્યૂહ હતો પરંતુ હવે ભાજપે સત્તાવાર જાહેરાત કરી દીધા બાદ કોંગ્રેસ પણ હવે સાંજ સુધીમાં પોતાનો ઉમેદવાર જાહેર કરે તેવી પૂર્ણ સંભાવના છે.
ભાવનગર પૂર્વની બેઠક વાણીયા બ્રાહ્મણની બેઠક ગણાય છે પરંતુ આ મત વિસ્તારમાં કોળી મતદારોની સંખ્યા મોટી છે સાથે કોંગ્રેસ ઉમેદવારને ટિકિટ અપાય તો જબ્બર ફાઈટ આપે તેવું અનુમાન છે, આથી કોંગ્રેસમાંથી કોળી જ્ઞાતિના બળદેવભાઈ સોલંકીને ઉમેદવાર બનાવવાની સંભાવના વ્યક્ત થઇ રહી છે તો પીઢ અને જુના જોગી એવા જીતુભાઈ ઉપાધ્યાયનું નામ પણ ચાલી રહ્યું છે આ ઉપરાંત ગત વખતે વિભાવરી બેનની સામે ચૂંટણી લડેલા નીતાબેન રાઠોડનું નામ પણ હાલ ચર્ચામાં છે. કોંગ્રેસ સંગઠન દ્વારા ત્રણેય નામોની ચર્ચા વિચારણા ચાલી રહી છે અને બહુ જલ્દીથી પોતાનો ઉમેદવાર જાહેર થાય તેવી સંભાવના હોવાનું જાણવા મળ્યું છે.
