બ્રાઝિલના દક્ષિણ-પૂર્વ વિસ્તારમાં એક હુમલાખોરે બે સ્કૂલોમાં ઘૂસીને અંધાધૂંધ ફાયરિંગ કર્યું. આ ઘટનામાં બે શિક્ષકો અને એક વિદ્યાર્થીનું મોત થયું છે. જ્યારે 11 લોકો ઈજાગ્રસ્ત થયા છે. સીસીટીવી ફુટેજમાં દેખાઈ રહ્યું છે કે, હુમલાખોરે બુલેટપ્રૂફ જેકેટ પહેરેલું છે. સાથે જ તેના હાથમાં સેમી ઓટોમેટિક પિસ્તોલ પણ જોવા મળી રહી છે. પોલીસે ઘટનાસ્થળે પહોંચી ફાયરિંગ કરનારની શોધખોળ તેજ કરી છે.
ન્યૂઝ એજન્સીના જણાવ્યા અનુસાર, રાજ્યના જાહેર સુરક્ષા સચિવાલયે એક નિવેદનમાં જણાવ્યું કે ફાયરિંગ પ્રાથમિક અને માધ્યમિક સ્કૂલોમાં કરવામાં આવ્યું હતું. અહીં વિદ્યાર્થીઓ અને શિક્ષકો હતા. આ ઘટના એસ્પિરિટો સેન્ટો રાજ્યના અરાક્રુઝ શહેરની છે. આ બંને સ્કૂલો એક જ રોડ પર આવેલી છે. જો કે, હજુ સુધી હુમલાખોર પોલીસ પકડથી દૂર છે.
