સુરતમાં હીરા ઉદ્યોગકાર તથા બે બિલ્ડરો પર ઇન્કમટેક્સના દરોડા

ગુજરાતમાં વિધાનસભા ચૂંટણીના પ્રથમ તબક્કા દરમિયાન આવકવેરા વિભાગે ત્રણ દરોડા ઓપરેશન કર્યા બાદ હવે મતદાનના બીજા જ દિવસે સુરતમાં મેગા ઓપરેશન હાથ ધરવામાં આવ્યું છે અને હીરાના મોટા ગજાના વેપારી તથા બે બિલ્ડરો પર સવારથી દરોડા કાર્યવાહી હાથ ધરવામાં આવી છે.
આવકવેરા ખાતાના સુત્રોએ જણાવ્યું છે કે સુરતના હીરા ઉદ્યોગમાં મોટુ નામ ધરાવતા અને અરવિંદ ધાનેરા તરીકે ઓળખાતા ધાનેરા ગ્રુપને નિશાન બનાવવામાં આવ્યું છે અને તેમની સાથે સંકળાયેલા બે બિલ્ડરો નરેશ વીડિયો અને હિંમતભાઈને પણ ઝપટે લેવામાં આવ્યા છે. ત્રણેયના રહેઠાણ ઉપરાંત ઓફીસો તથા બિલ્ડીંગ સાઈટોને પણ દરોડામાં આવરી લેવામાં આવી છે. 40 જેટલા સ્થળોએ દરોડા કાર્યવાહી ચાલી રહી છે અને મોટી રકમના બિનહિસાબી વ્યવહારો તથા કરચોરી પકડાવાની આશંકા વ્યકત કરવામાં આવી રહી છે.
સુરતમાં ગઇકાલે જ વિધાનસભાનું ચૂંટણી મતદાન પૂર્ણ થયું હતું અને તેના બીજા જ દિવસે આજે સવારથી મોટાપાયે દરોડા ઓપરેશન શરુ થતાં હીરા ઉદ્યોગ સહિત સમગ્ર વેપાર ઉદ્યોગ આલમમાં ખળભળાટ સર્જાયો છે. રાજકીય પ્રત્યાઘાતો પડવાની પણ આશંકા વ્યક્ત કરવામાં આવી રહી છે. વિધાનસભા ચૂંટણીના પ્રથમ તબક્કાની પ્રક્રિયા દરમિયાન પણ ગુજરાતમાં ત્રણ વખત ઇન્કમટેક્સના દરોડા પડ્યા હતા અને તેના પણ આકરા પ્રત્યાઘાતો પડ્યા હતા. કચ્છમાં ખાવડાવાલા ગ્રુપ ઉપરાંત રાજકોટના મેટ્રો પોલીસ પેથ લેબતથા બે દિવસ પૂર્વે વડોદરામાં પ્લાસ્ટીકના ઉદ્યોગકાર પર દરોડા કાર્યવાહી કરવામાં આવી હતી.