સિહોર તાલુકાના ગઢુલા ગામમાં ચાલતા જુગારના અખાડામાં એલ.સી.બી. પોલીસે દરોડો પાડી જુગાર રમતા ત્રણ ઈસમોને ઝડપી લઇ રૂ.૨.૧૫ લાખ રોકડા, વાહનો,મોબાઈલ મળી કુલ રૂ. ૬.૬૫ લાખનો મુદ્દામાલ કબજે કરી કાયદેસર કાર્યવાહી હાથ ધરી હતી. દરોડા દરમિયાન છ આરોપીઓ ફરાર થઈ ગયા હતા.આ જુગારના અડ્ડામાં સિહોર, ઉમરાળા, ગઢડા,અમરેલી સહિતના પંથકમાંથી ખેલૈયાઓ જુગાર રમવા આવ્યા હતા.
આ અંગે મળતી વિગતો મુજબ એલ.સી.બી. પોલીસ કાફલો સિહોર તાલુકાના ગ્રામ્ય વિસ્તારમાં પેટ્રોલિંગમાં હતો તે દરમિયાન બાતમી મળી હતી કે, શિહોર તાલુકાના ગઢુલા ગામમાં રહેતા મયુરસિંહ દશરથસિંહ ગોહિલ તેના કબજા, ભોગવટાના ભાવપરા રોડ ઉપર આવેલ માલઢોર બાંધવાના વંડામાં બહારથી માણસો બોલાવી હારજીનો જુગાર રમાડી પોતાના આર્થિક લાભ માટે રવજીભાઈ ઉર્ફે ભગત દ્વારા નાળ ઉઘરાવી જુગારનો અખાડો ચલાવતા હોય, એલ.સી.બી.એ મળેલી બાતમીના આધારે મયુરસિંહ દશરથસિંહ ગોહિલના વાડામાં દરોડો પાડી જુગાર રમતા શિવરાજ ગભરુભાઈ ખાચર રહે. પીપરડી, તા. ગઢડા, રમેશ હીરાભાઈ ગોલેતર રહે. ઢસા અને દેવાયત સુરાભાઈ સાંબડ રહે. સણોસરા વાળાને ઝડપી લીધા હતા. જ્યારે રવજી ઉર્ફે ભગત મેરાભાઈ આહીર, ગોવિંદ જીવાભાઇ કેરાસીયા, ચકાભાઇ, ભુવાભાઈ, ભુપતભાઈ ભરવાડ અને મયુરસિંહ દશરથસિંહ ગોહિલ ફરાર થઈ ગયા હતા.
એલ.સી.બી.એ પટમાંથી રોકડા રૂ. ૨.૧૫,૬૦૦, છ વાહનો, ચાર મોબાઇલ મળી કુલ રૂ. ૬,૬૫,૩૦૦ નો મુદ્દામાલ કબજે કરી તમામ વિરુદ્ધ સોનગઢ પોલીસ મથકમાં જુગારધારાની કલમ ૪ અને પ મુજબ ગુનો દાખલ કરાવી કાયદેસર કાર્યવાહી હાથ ધરી હતી.
