ઉત્તરપ્રદેશના ફર્રુખાબાદ જિલ્લામાં શુક્રવારના રોજ એક ૨૧ વર્ષીય યુવતીએ અંતિમ સમયે પોતાના લગ્ન રદ્દ કરવાનો નિર્ણય લીધો. પ્રાપ્ત જાણકારી અનુસાર, યુવક માનસિક બીમારીનો શિકાર હતો પરંતુ તેના પરિવારના લોકોએ આ વાત છુપાવીને રાખી હતી. લગ્ન સમયે યુવક પૈસા ઘણી નહોતો શક્યો અને તે સમયે હકીકત સામે આવી હતી.
સમગ્ર ઘટનાની વિગતવાર વાત કરવામાં આવે તો લગ્ન સમયે જ્યારે પંડિતજી વિધી કરાવી રહ્યા હતા ત્યારે તેમને વરરાજાના વર્તન પ્રત્યે શંકા ઉભી થઈ હતી. પંડિતને લાગ્યું કે કંઈક તો ગરબડ છે અને તેમણે યુવતીના પરિવારને આ વાતની જાણ કરી હતી. ત્યારપછી સમગ્ર બાબતનો ખુલાસો થઈ શક્યો હતો. મોહમ્મદાબાદ કોટવાલી વિસ્તારમાં આવેલા દુર્ગાપુર ગામમાં રહેતી યુવતી રીટા સિંહ તરત જ મંડપ પરથી નીચે ઉતરી ગઈ હતી. દુલ્હન આ રીતે નીચે આવી જતા બન્ને પરિવાર વચ્ચે ચર્ચા શરુ થઈ અને બોલાચાલી થઈ ગઈ હતી. વાત આગળ વધી તો પોલીસને પણ બોલાવવાનો વારો આવ્યો હતો. દુલ્હનના પરિવારના લોકોનો દાવો છે કે, લગ્નના દિવસ સુધી તેમને ખબર નહોતી કે વરરાજાની માનસિક સ્થિતિ સારી નથી. કન્યાના ભાઈ મોહિત જણાવે છે કે, લગ્નો વિશ્વાસના આધાર પર થતા હોય છે. જેણે વચ્ચે પડીને લગ્ન નક્કી કરાવ્યા તે અમારા નજીકના સગા છે. અમે તેમના પર વિશ્વાસ રાખ્યો અને યુવકને મળ્યા પણ નહોતા. જ્યારે પંડિતજીએ અમને તેના વર્તન વિશે જાણકારી આપી તો અમે એક પરીક્ષા લેવાનો નિર્ણય લીધો. અમે તેને ૧૦ રુપિયાની ૩૦ નોટ આપી, અને તે ગણી નહોતો શક્યો. આ સ્થિતિ વિશે જાણ્યા પછી અમે લગ્ન રદ્દ કરવાનો નિર્ણય લીધો.
જિલ્લા પંચાયતના એક સભ્ય ગુલુ મિશ્રા જણાવે છે કે, યુવતીએ લગ્ન રદ્દ કર્યા તો બન્ને પક્ષો વચ્ચે બોલાચાલી શરુ થઈ ગઈ. વાત પોલીસ સ્ટેશન સુધી પહોંચી અને તેમણે સમાધાનનો પ્રયત્ન કર્યો. પરંતુ દુલ્હન માનવા માટે તૈયાર નહોતી. માટે જાન પાછી વળી હતી. હજી સુધી તો આ બાબતે કોઈ પોલીસ ફરિયાદ દાખલ કરવામાં નથી આવી.
