રાજ્યમાં ACB અને CBIની ટીમે 2 મોટી કાર્યવાહી કરી છે. વિગતો મુજબ SGSTમાં ગાંધીધામ ખાતે ફરજ બજાવતા એક આસિસ્ટન્ટ કમિશ્નર આવક કરતા વધારે સંપત્તિ ધરાવતા હોવાની ચર્ચા હતી. આ તરફ ચોક્કસ માહિતી આધારે CBIની ટીમે તેમના ઘરે સર્ચ કરતાં રોકડા રૂ.42 લાખ, દાગીના, વિદેશી ચલણ, બેંક બેલેન્સ મળીને અંદાજે રૂ.1 કરોડની સંપત્તિ મળી આવતા હડકંપ મચી ગઈ છે. આ સાથે અમદાવાદ, ગાંધીધામ અને રાજસ્થાનના બાડમેરમાં પણ કરોડો રૂપિયાની સ્થાવર-જંગમ મિલકતો મળી આવતા ચકચાર મચી ગઈ છે.
ગાંધીધામ ખાતે SGSTમાં આસિસ્ટન્ટ કમિશ્નર તરીકે ફરજ બજાવતા અને અગાઉ એક્સસાઇઝ ઇન્ટેલિજન્સ અને ઇડીમાં ફરજ બજાવનાર મહેશ ચૌધરીને ત્યાંથી CBIને અત્યારસુધીમાં સત્તાવાર રૂ.3.71 કરોડની અપ્રમાણસર મિલકતો મળી જે તેમની સત્તાવાર આવક કરતાં 74 ટકા વધારે હતી. નોંધનીય છે કે, આવક કરતાં અનેક ગણી વધારે સંપત્તિ ધરાવતા હોવાની બાતમીના આધારે દિલ્હી CBIની ટીમે તપાસ શરુ કરી હતી.
CBIની ટીમે આસિસ્ટન્ટ કમિશ્નર મહેશ ચૌધરીના ઘરે સર્ચ દરમિયાન રોકડા રૂ.42 લાખ, દાગીના, મોંઘી ઘડિયાળો, વિદેશી ચલણ, બેંક બેલેન્સ તેમજ સ્થાવર અને જંગમ મિલકતમાં રોકાણ મળી આવ્યુ હતુ. જે અંદાજે રૂ.1 કરોડ જેટલું થાય છે. આ ઉપરાંત અમદાવાદ, ગાંધીધામ અને રાજસ્થાન બાડમેરમાં સ્થાવર અને જંગમ મિલકતો મળીને રૂ.3.71 કરોડનું રોકાણ મળી આવ્યુ હતુ.
10 કરોડથી વધુ અપ્રમાણસર મિલકત મળવાનો અંદાજ
CBIના સૂત્રો મુજબ મહેશ ચૌધરી અને તેમનાં પત્ની વિરુદ્ધ 8 ફેબ્રુઆરીના રોજ અપ્રમાણસર મિલકતનો ગુનો નોંધવામાં આવ્યો હતો. જેમાં પ્રાથમિક તપાસમાં જ રૂ.3.71 કરોડની અપ્રમાણસર મિલકત મળી આવી છે. જોકે હાલમાં પણ અમદાવાદ, ગાંધીનગર અને રાજસ્થાન ખાતે સર્ચ ચાલુ જ છે. જેમાં અંદાજે રૂ.10 કરોડની અપ્રમાણસર મિલકત મળવાનો અંદાજ છે. વિગતો મુજબ મહેશ ચૌધરી મૂળ રાજસ્થાનના બાડમેરનો રહેવાસી છે. CBIની ટીમે અમદાવાદમાં ચૌધરીના જે ફલેટમાં સર્ચ કર્યુ હતું. તેની કિંમત અંદાજે રૂ.6 કરોડ હોવાનું જાણવા મળ્યું છે. આ ઉપરાંત ચૌધરી બાડમેર તેમજ અમદાવાદમાં અન્ય મિલકતો ધરાવતા હોવાનું સામે આવ્યું છે.
