પાકિસ્તાન અને અફઘાનિસ્તાન વચ્ચે રમાયેલી ત્રણ T20 શ્રેણીની છેલ્લી મેચમાં પાકિસ્તાને 66 રનથી જીત મેળવી હતી. પાકિસ્તાને શ્રેણી ગુમાવ્યા બાદ ત્રીજી મેચ જીતી લીધી હતી. આ સિરીઝમાં પાકિસ્તાનને શરૂઆતની બંને મેચ હારવી પડી હતી. શાદાબ ખાનના નેતૃત્વમાં પાકિસ્તાનને ટી-20 શ્રેણીમાં પ્રથમ વખત અફઘાનિસ્તાન સામે હારનો સામનો કરવો પડ્યો હતો. આ સિરીઝમાં રાશિદ ખાનની કપ્તાનીમાં અફઘાનિસ્તાને 2-1થી જીત મેળવી હતી.
પાકિસ્તાને ત્રીજી મેચમાં વાપસી કરી હતી
સતત બે મેચ હાર્યા બાદ પાકિસ્તાને ત્રીજી મેચમાં જોરદાર વાપસી કરી હતી. આ મેચમાં પાકિસ્તાનની ટીમ પ્રથમ બેટિંગ કરવા ઉતરી હતી અને 20 ઓવરમાં 7 વિકેટે 182 રન બનાવ્યા હતા. જેમાં યુવા ઓપનિંગ બેટ્સમેન સેમ અયુબે 40 બોલમાં 4 ચોગ્ગા અને 2 છગ્ગાની મદદથી 49 રન બનાવ્યા હતા, જ્યારે મિડલ ઓર્ડર બેટ્સમેન ઈફ્તિખાર અહેમદે 25 બોલમાં 2 છગ્ગાની મદદથી ટીમ માટે 31 રન ઉમેર્યા હતા. આ સિવાય કેપ્ટન શાદાબ ખાને 28, અબ્દુલ્લા શફીકે 23, ઈમાદ વસીમ 13 અને તૈયબ તાહિરે 10 રન બનાવ્યા હતા અને બાકીના બેટ્સમેનો ડબલ ફિગરને સ્પર્શી શક્યા ન હતા.
રનનો પીછો કરતા અફઘાનિસ્તાનની ટીમ 18.4 ઓવરમાં 116 રનમાં ઓલઆઉટ થઈ ગઈ હતી. નીચલા ક્રમના બેટ્સમેન અઝમતુલ્લા ઉમરઝાઈએ ટીમ માટે સૌથી વધુ 21 રનની ઈનિંગ રમી હતી, અન્ય કોઈ બેટ્સમેન 20 રનના આંકડા સુધી પહોંચી શક્યા નહોતા અને ત્રણ બેટ્સમેન ખાતું ખોલાવ્યા વિના પેવેલિયન પરત ફર્યા હતા.
પાકિસ્તાનની બોલિંગ મજબૂત દેખાતી હતી
આ મેચમાં બેટિંગ ઉપરાંત પાકિસ્તાન તરફથી બોલિંગમાં પણ શાનદાર લય જોવા મળી હતી. ટીમના યુવા ફાસ્ટ બોલર ઈહસાનુલ્લાએ 4 ઓવરમાં 29 રન આપીને 3 વિકેટ લીધી હતી જ્યારે કેપ્ટન શાદાબ ખાને 3 વિકેટ લીધી હતી. આ દરમિયાન શાદાબ ખાને માત્ર 3.20ની ઈકોનોમી સાથે 13 રન ખર્ચ્યા હતા. આ સિવાય ફાસ્ટ બોલર વસીમ જુનિયર, જમાન ખાન અને સ્પિનર ઈમાદ વામીસને 1-1 સફળતા મળી હતી.
