પાકિસ્તાન અને ન્યુઝીલેન્ડ વચ્ચે રમાઈ રહેલી પાંચ T20I શ્રેણીની બીજી મેચમાં પાકિસ્તાનના કેપ્ટન બાબર આઝમે સદી ફટકારી. આ મેચ ગયા શનિવારે,15 એપ્રિલે લાહોરમાં રમાઈ હતી. બાબર આઝમની સદીની મદદથી પાકિસ્તાને આ મેચ 38 રને જીતી લીધી હતી. બાબર આઝમે આ મેચમાં સદી ફટકારીને એક ખાસ રેકોર્ડ બનાવ્યો હતો. ટી20 ઈન્ટરનેશનલમાં બાબર આઝમની આ ત્રીજી સદી હતી. બાબરે 58 બોલમાં 11 ચોગ્ગા અને 3 છગ્ગાની મદદથી અણનમ 101 રન બનાવ્યા હતા.
આમ કરનાર પ્રથમ કેપ્ટન બન્યો
બાબર આઝમ T20 ઈન્ટરનેશનલમાં ત્રણ સદી ફટકારનાર પ્રથમ કેપ્ટન બની ગયો છે. બાબરે 2021, 2022 અને 2023માં સતત ત્રણ વર્ષ T20 ઈન્ટરનેશનલમાં સદી ફટકારી છે. બાબરે તેની પ્રથમ ટી20 આંતરરાષ્ટ્રીય સદી સેન્ચુરિયનમાં દક્ષિણ આફ્રિકા સામે, બીજી ઈંગ્લેન્ડ સામે કરાચીમાં અને ત્રીજી ન્યૂઝીલેન્ડ સામે લાહોરમાં ફટકારી હતી.
બાબર આઝમ રોહિત શર્માની નજીક આવ્યો
બાબર આઝમ ટી20 ઈન્ટરનેશનલમાં પોતાની ત્રીજી સદી ફટકારીને વર્તમાન ભારતીય કેપ્ટન રોહિત શર્માની નજીક પહોંચી ગયો છે. રોહિત શર્મા એવો બેટ્સમેન છે જેણે અત્યાર સુધી T20 ઈન્ટરનેશનલમાં સૌથી વધુ 4 સદી ફટકારી છે. બીજી તરફ બાબરે આ મામલે ભારતીય બેટ્સમેન સૂર્યકુમાર યાદવની બરાબરી કરી લીધી છે. સૂર્યાએ તેની T20 આંતરરાષ્ટ્રીય કારકિર્દીમાં અત્યાર સુધી કુલ 3 સદી પણ ફટકારી છે.
મેચની વિગત
પાકિસ્તાન અને ન્યુઝીલેન્ડ વચ્ચે રમાયેલી બીજી T20 ઈન્ટરનેશનલ મેચમાં પાકિસ્તાને ટોસ જીતીને પ્રથમ બેટિંગ કરવાનો નિર્ણય કર્યો અને 20 ઓવરમાં 4 વિકેટે 192 રન બનાવ્યા. ટીમ વતી બાબર આઝમે સદી (101*) ફટકારી હતી. આ સિવાય સાથી ઓપનર મોહમ્મદ રિઝવાને અડધી સદી ફટકારી હતી. રિઝવાને 34 બોલમાં 6 ચોગ્ગા અને 1 છગ્ગાની મદદથી 50 રન બનાવ્યા હતા. રનનો પીછો કરવા ઉતરેલી ન્યુઝીલેન્ડની ટીમ 20 ઓવરમાં 7 વિકેટે 154 રન જ બનાવી શકી હતી.
