પહાડો પર થઈ રહેલા ભારે વરસાદને કારણે ગંગા નદીએ રૌદ્ર સ્વરૂપ ધારણ કરી લીધું છે. નદીના ધોવાણને કારણે ઋષિકેશમાં રામ ઝુલા બ્રિજનો સપોર્ટિંગ વાયર તૂટી ગયો, ત્યારબાદ રામ ઝુલા પર વાહનોની અવરજવર બંધ કરી દેવામાં આવી છે. ઋષિકેશનો આ રામ ઝુલા બ્રિજ અહીં આવતા પ્રવાસીઓ માટે આકર્ષણનું કેન્દ્ર હોય છે, પરંતુ પુલ પરની અવરજવર બંધ થયા બાદ અહીંના લોકો હવે ગંગાના જળસ્તરમાં ઘટાડાની રાહ જોઈ રહ્યા છે જેથી પુલનું સમારકામ થઈ શકે.
પ્રવાસીઓની આસ્થાનું કેન્દ્ર છે રામ ઝુલા
રામ ઝુલા અને લક્ષ્મણ ઝુલા પુલ બંને કોઈપણ પ્રવાસી માટે આકર્ષણનું કેન્દ્ર રહે છે જેઓ ઋષિકેશમાં ગંગામાં સ્નાન કરવા આવે છે. દરેક પ્રવાસી બંને બ્રિજની મુલાકાત લેવા ઇચ્છે છે, રાત્રિ દરમિયાન બ્રિજની સુંદરતા વધુ જોવા લાયક હોય છે, તેથી મોટાભાગના પ્રવાસીઓ રામ ઝુલા પુલ પર ફરવા જાય છે, પરંતુ બ્રિજના પાયામાં આવેલી તિરાડના કારણે પ્રવાસીઓને અત્યારે તેની મુલાકાત લેવાની મંજૂરી નથી. હવે પ્રવાસીઓ રામ ઝુલા પુલ પર થોડા દિવસો સુધી ફરી શકશે નહીં.
હિમાચલ દુર્ઘટનામાં મૃત્યુઆંક વધીને 74 થયો
જણાવી દઈએ કે હિમાચલ પ્રદેશમાં થયેલી તબાહી પછી પણ સ્થિતિ ખૂબ જ ખરાબ છે. છેલ્લા ચાર દિવસથી ચાલી રહેલા બચાવ અભિયાન વચ્ચે મૃતકોની સંખ્યા વધી રહી છે. પૂર, વરસાદ અને ભૂસ્ખલનના કારણે અત્યાર સુધીમાં 74 લોકોએ જીવ ગુમાવ્યા છે. શિમલામાં જે શિવ મંદિર પર મુસીબતોનો પહાડ તૂટી પડ્યો હતો, ત્યાં બચાવકાર્ય હજુ પણ ચાલુ છે. અહીં ભારે વરસાદ બાદ પહાડોમાં તિરાડ પડી રહી છે જેના કારણે લોકોને નજીકના ઘરો છોડવાની ફરજ પડી છે.
અત્યાર સુધીમાં 10 હજારથી વધુ ઘરને નુકસાન થયું
સમગ્ર હિમાચલમાં લગભગ 10,000 ઘરોને નુકસાન થયું છે. કાંગડામાં ભારે વરસાદ અને ડેમમાંથી પાણી છોડવામાં આવ્યા બાદ એરફોર્સને બચાવ માટે બોલાવવી પડી હતી, તેથી ઘણા વિસ્તારોમાં હજુ પણ રસ્તાઓ ચાલુ નથી. મુખ્ય મંત્રી સુખવિન્દર સિંહ સુખુએ જણાવ્યું કે ભારે ચોમાસાના વરસાદથી નુકસાન પામેલા ઈન્ફ્રાસ્ટ્રક્ચરને ફરીથી બનાવવામાં એક વર્ષ લાગશે. સુખુએ કહ્યું કે ગયા મહિને અને આ અઠવાડિયે થયેલા ભારે વરસાદને કારણે રાજ્યમાં અંદાજે 10,000 કરોડ રૂપિયાનું નુકસાન થયું છે.
