રાજ્યના ડીસા તાલુકાના બાઈવાડા ગામે યુજીવીસીએલ (UGVCL) સબ સ્ટેશનમાં સમારકામ કરતા પાંચ કર્મચારીઓ ગંભીર રીતે દાઝી ગયા હતા, મળતા અહેવાલ પ્રમાણે ડીસા તાલુકાના બાઈવાડા ગામે ગઈકાલે રાત્રે યુજીવીસીએલ સબ સ્ટેશનમાં ટ્રાન્સફોર્મર પાસે બસ કપલરમાં અવાજ આવી રહ્યો હતો. જેથી કર્મચારીઓએ તેનું સમારકામ શરૂ કર્યું હતું અને આ સમારકામ ચાલી રહ્યું હતું તે સમયે અચાનક પાવર બ્રેકર ફાયર થતાં કામ કરી રહેલા પાંચ જેટલા કર્મચારીઓ ગંભીર રીતે દાઝ્યા હતા.
અચાનક ફાયર થતાં કર્મચારીઓ હાથ અને પગ પર ગંભીર રીતે દાઝી જતા અફરા તફરી મચી ગઈ હતી. બનાવને પગલે સબ સ્ટેશનમાં કામ કરતા અન્ય કર્મચારીઓ દોડી આવી રાહત કામગીરી શરૂ કરી હતી તેમજ તમામ ઇજાગ્રસ્ત લોકોને સારવાર માટે ડીસાની ખાનગી હોસ્પિટલમાં ખસેડ્યા હતા. સદનસીબે મોટી જાનહાની ટળી હતી પરંતુ ઇજાગ્રસ્ત થયેલ ડી એન રાવલ, ડી સી બાવા, કે આઈ પરમાર, એમ આર બારોટ અને એચ ટી રાવલ સહિત તમામ કર્મચારીઓ હાલમાં સારવાર હેઠળ છે. આ અંગે ડીસા ટ્રાન્સમિશન ડિવિઝનના કાર્યપાલક ઈજનેર એમ જી રાઠવાએ જણાવ્યું હતું કે બાઈવાડા ગામે જેટકોનું 66 કેવી સબ સ્ટેશન આવેલું છે. જ્યાં કર્મચારીઓ સમારકામ કરી રહ્યા હતા તે સમયે અચાનક બ્રેકર ફાયર થતાં ઘટના સર્જાઇ છે.
પાંચ કર્મચારીઓ ગંભીર રીતે દાઝી જતા તેમને સારવાર માટે ડીસાની ખાનગી હોસ્પિટલમાં લાવવામાં આવ્યા છે. પ્રાથમિક સારવાર દરમ્યાન ડોક્ટરના રિપોર્ટ પ્રમાણે એક કર્મચારીને 50% થી વધુ ઇન્જરી હોવાથી તેને વધુ સારવાર માટે અમદાવાદ હોસ્પિટલમાં ખસેડાયો છે.
