મહારાણા પ્રતાપના વંશજને ભાજપે આપી ટિકિટ

રાજસ્થાનમાં રાજવી પરિવાર સાથે જોડાયેલા લોકો રાજકીય પક્ષોમાં જોડાઇ રહ્યાં છે. તાજેતરમાં ઉદયપુરના રાજવી પરિવારના વિશ્વરાજ સિંહ મેવાડ ભાજપમાં સામેલ થયા હતા. વિશ્વરાજ સિંહના પિતા મહેન્દ્રસિંહ મેવાડ ભાજપના લોકસભા સાંસદ રહી ચુક્યા છે. મેવાડ રાજવી પરિવારના વિશ્વરાજ સિંહને ભાજપે નાથદ્વારાથી ટિકિટ આપી છે. કોંગ્રેસે પ્રથમ યાદીમાં નાથદ્વારાથી ડૉ સીપી જોશીને ઉમેદવાર જાહેર કર્યા છે.
રાજસ્થાન ચૂંટણી પહેલા એક અન્ય રાજપરિવારની સક્રિયતા ચર્ચામાં છે. થોડા સમય પહેલા ભાજપે પોતાના કેટલાક નેતાઓની હાજરીમાં વિશ્વરાજ સિંહ મેવાડને પાર્ટીમાં સામેલ કર્યા હતા. વિશ્વરાજ સિંહ મહારાણા પ્રતાપના વંશજ છે અને ઉદયપુર રાજપરિવારના સભ્ય છે. વિશ્વરાજ સિંહ મેવાડ રાજ્યના અંતિમ મહારાણા ભગવત સિંહના પૌત્ર છે. કહેવામાં આવે છે કે તેમના ભાજપમાં સામેલ થવાથી મેવાડની રાજનીતિ પર મોટી અસર પડી શકે છે. ભાજપ પણ તેનો ફાયદો ઉઠાવવાના પ્રયાસમાં છે.
વિશ્વરાજ સિંહના પિતા મહેન્દ્રસિંહ મેવાડ ભાજપના જ ટિકિટથી લોકસભા સાંસદ રહી ચુક્યા છે. ભાજપની રાજનીતિ સાથે આ રાજપરિવારનો સંબંધ કોઇ નવો નથી. વિશ્વરાજ સિંહના દાદા મહારાણા ભગવત સિંહ 1969માં સર્વસમ્મતિથી વિશ્વ હિન્દૂ પરિષદના અધ્યક્ષ પણ બન્યા હતા. વિશ્વરાજના પિતા મહેન્દ્રસિંહ મેવાડના નામે ચિતોડગઢથી સૌથી મોટી જીતનો રેકોર્ડ છે. 1989માં યોજાયેલી ચૂંટણીમાં તે 1 લાખ 90 હજાર મતથી જીત્યા હતા. આ અત્યાર સુધીનું સૌથી મોટુ અંતર છે. તે પછી મહેન્દ્રસિંહ મેવાડ કોંગ્રેસમાં જોડાયા હતા અને તેમણે ચૂંટણીમાં હારનો સામનો કરવો પડ્યો હતો. મહેન્દ્રસિંહ મેવાડના સાંસદ બનવાના ત્રણ દાયકા પછી તેમના પરિવારનો કોઇ સભ્ય ભાજપમાં સામેલ થયો છે.