ઉત્તરકાશીમાં યમુનોત્રી નેશનલ હાઈવે પર નિર્માણાધીન સિલ્ક્યારા ટનલનો એક ભાગ તૂટી પડવાને કારણે 41 મજૂરો છેલ્લા એક સપ્તાહથી ફસાયેલા છે. ફસાયેલા મજૂરોને બહાર કાઢવાની કામગીરી ચાલી રહી છે. અકસ્માતના 9 દિવસ બાદ સોમવારે સાંજે 6 ઈંચની નવી પાઈપલાઈન દ્વારા સુરંગની અંદર ફસાયેલા કામદારો માટે ખીચડી, દાળ અને કેટલાક ફળો મોકલવામાં આવ્યા હતા. અત્યાર સુધી ફસાયેલા મજૂરો માટે માત્ર સૂકો ખોરાક જ મોકલવામાં આવતો હતો, પરંતુ 9 દિવસ પછી તેમના સુધી ખોરાક પહોંચાડવો એ બચાવ ટીમ માટે મોટી સફળતા માનવામાં આવે છે.
ટનલમાં તેમના જીવનને સુરક્ષિત રાખવા માટે, તેમને મલ્ટીવિટામિન્સ અને ડ્રાય ફ્રૂટ્સ તેમજ એન્ટી-ડિપ્રેશન દવાઓ આપવામાં આવી રહી છે. બે દિવસ પહેલા કેટલાક કામદારોને ઉલટીની જાણ થઈ હતી, ત્યારબાદ તેમને કેટલીક દવાઓ મોકલવામાં આવી હતી.ઉત્તરાખંડ સરકારે જણાવ્યું હતું કે સુરંગની અંદર ફસાયેલા 41 બાંધકામ કામદારોને એન્ટી ડિપ્રેસન્ટ ગોળીઓ આપવામાં આવી રહી છે. કુલ 10 એમ્બ્યુલન્સ તેમજ ડોકટરો અને આરોગ્ય કર્મચારીઓને સુરંગની બહાર તૈનાત કરવામાં આવ્યા છે.
ઉત્તરકાશીના ચીફ મેડિકલ ઓફિસર (સીએમઓ), ડૉ. આરસીએસ પંવારે કહ્યું, “અમે કામદારોના પોષણની પણ કાળજી લઈ રહ્યા છીએ અને તેમને ચણા, ચોખા જેવી વસ્તુઓ પણ મોકલીએ છીએ. આરોગ્ય અધિકારીએ કહ્યું કે બચાવ કામગીરી સ્થગિત થવાને કારણે તેમના ડોક્ટરો પ્રથમ દિવસથી ફસાયેલા કામદારો સાથે વાત કરી શક્યા ન હતા.
