ગુજરાતમાં સરકારી પરીક્ષાની તૈયારી કરતા ઉમેદવારો માટે કામના સમાચાર આવ્યા છે. જેમાં ફોરેસ્ટ બીટ ગાર્ડની પરીક્ષાની તારીખ જાહેર કરવામાં આવી છે. આગામી 8 ફેબ્રુઆરી 2024થી ફોરેસ્ટ બીટ ગાર્ડની પરીક્ષા લેશે. આ પરીક્ષા ગૌણ સેવા પસંદગી મંડળ લેશે અને રાજ્યના 11 જિલ્લાના સેન્ટરો પર પરીક્ષા લેવાનું આયોજન છે.
ગૌણ સેવા પસંદગી મંડળના સચિવ હસમુખ પટેલ જણાવ્યું હતું કે રાજ્યમાં વર્ગ 3ની 5 હજાર જગ્યાઓ માટે 15 દિવસમાં ભરતીની જાહેરાત થશે તેમજ આગામી 8 ફેબ્રુઆરીથી ગૌણ સેવા પસંદગી મંડળ ફોરેસ્ટ બીટ ગાર્ડની પરીક્ષા લેશે. રોજના 50 હજાર જેટલાં ઉમેદવારો ફોરેસ્ટ બીટ ગાર્ડની પરીક્ષા આપશે અને આ પરીક્ષા કોમ્પ્યુટર આધારિત હશે જે 7 દિવસ સુધી ચાલશે. રાજ્યભરમાંથી કુલ 4.18 લાખ ઉમેદવારો ફોરેસ્ટ બીટ ગાર્ડની પરીક્ષામાં આપશે અને રાજ્યના 11 જિલ્લાના સેન્ટરો પર પરીક્ષા લેવાનું આયોજન થશે.
રાજ્ય સરકારે વર્ગ-3ની ભરતી માટેના નિયમોમાં કેટલાક ફેરફાર કર્યા છે જેમાં હવે જૂનિયર ક્લાર્કની પરીક્ષા MCQ પદ્ધતિથી લેવામાં આવશે. વધુમાં હેડક્લાર્ક, ઓફિસ આસિસ્ટન્ટ સહિત વિવિધ 21 સંવર્ગની ભરતી માટે મુખ્ય લેખિત પરીક્ષા લેવામાં આવે તેવો પણ નિર્ણય કરવામાં આવ્યો છે. આ અંગે સરકાર દ્વારા સત્તાવાર નોટિફિકેશન પણ બહાર પાડવામાં આવ્યું છે.
