ભારતીય શેરબજાર માટે આજનો દિવસ ઐતિહાસિક બન્યો છે. આજે બજાર ખુલતા નિફ્ટીએ 22,500ની નવી ટોચને સ્પર્શ કરતા ઇતિહાસ રચ્યો છે. આજે નિફ્ટી 22,505.30 પર ખુલ્યો હતો જે ઓપનિંગ સમયે ભારતીય શેરબજારમાં પ્રથમ વખત છે. આજે નિફ્ટીએ 22,523ની ઊંચી સપાટી બનાવી છે જે ઓલ ટાઈમ હાઈ લેવલ છે.
શેરબજારમાં આજે બજાર ખુલ્યા પછી તરત જ BSE સેન્સેક્સે 52 સપ્તાહની ઊંચી સપાટી બનાવી અને 74,245.17ના સ્તરને સ્પર્શ કર્યો, જે તેની જીવનકાળની સર્વોચ્ચ સપાટી છે. બીએસઈનો સેન્સેક્સ 156.75 પોઈન્ટ અથવા 0.21 ટકાના વધારા સાથે 74,242 પર અને એનએસઈનો નિફ્ટી 31.25 પોઈન્ટ અથવા 0.14 ટકાના વધારા સાથે 22,505.30 પર ખુલ્યો હતો. બજાર ખુલતાની સાથે જ સેન્સેક્સે 74,245ની સર્વકાલીન ઊંચી સપાટી બનાવી છે.
શેરબજારમાં અત્યારે તેજીનો માહોલ વધુ જોવા મળે છે. આ જોતા લાગે છે કે ભારત વિકસતા અર્થતંત્ર સાથે વિશ્વની પાંચમી અર્થવ્યવસ્થામાંથી વધુ એક ડગલું આગળ વધી શકે છે. આ મુદ્દે રિઝર્વ બેંક ઓફ ઈન્ડિયા (RBI)ના ગવર્નર શક્તિકાંત દાસનું કહેવું છે કે ભારત વિશ્વમાં સૌથી ઝડપથી વિકસતું મુખ્ય અર્થતંત્ર છે અને દેશનો વિકાસ દર આઠ ટકાની નજીક પહોંચી શકે છે. દાસે જણાવ્યું કે ચોથા ક્વાર્ટરમાં વૃદ્ધિ દર 5.9 ટકા રહી શકે છે. જો આમ જ રહેશે તો નાણાકીય વર્ષ 2024 માં વિકાસ દર 7.6 ટકાથી વધુ રહેશે. જીડીપી વૃદ્ધિ દર આઠ ટકાની આસપાસ રહેતા ત્રીજા ક્વાર્ટરમાં દેશની અર્થવ્યવસ્થા 8.4 ટકાની ઝડપે વૃદ્ધિ પામી છે.
