કાળજાળ ગરમી:૧૪ શહેરમાં તાપમાનનો પારો ૩૬ને પાર

રાજ્યમાં કાળઝાળ ગરમી શરુ થઈ ચૂકી છે. ઉનાળો તપવા લાગતા 14 શહેરોમાં તાપમાન 36 ડિગ્રી પાર થયું છે અને હવામાન વિભાગની આગાહી મુજબ હજુ પારો ઉંચે જવાનો છે. નલિયામાં તો અત્યારથી જ સૌથી વધુ 38.0 ડિગ્રી તાપમાન નોંધાયું છે.
રાજ્યમાં માર્ચ મહિનાના પહેલા સપ્તાહથી ઠંડીએ ધીમે ધીમે વિદાય લીધી છે અને ઉનાળાનો પ્રારંભ થતા ગરમીનું પ્રમાણ વધ્યુ છે. જો કે તાપમાનનો પારો ઉંચકાતા લોકોએ હવે કાળઝાળ ગરમી સહન કરવી પડશે. ઉનાળાનો ધીમા પગલે પ્રારંભ થઈ ગયો છે. આ વર્ષે શરૂઆતથી જ તાપમાન ઉંચકાવા માંડયુ છે. જેના પગલે હોળી પહેલાં કાળઝાળ ગરમીનો સામનો કરવા લોકોએ તૈયાર રહેવુ પડશે. છેલ્લા ચારેક દિવસથી રાત્રે થોડી ઘણી હજુ ઠંડક અનુભવાય છે પરંતુ દિવસે સવારથી જ ગરમી પડી રહી છે. રાજ્યના મોટાભાગના વિસ્તારોનુ મહત્તમ તાપમાન 36 ડિગ્રીની આસપાસ નોંધાયુ છે. આ મહિનાના અંતમાં હજુ તાપમાન ઉંચકાવાની હવામાન વિભાગે આગાહી કરી છે.