મહારાષ્ટ્રના ડેપ્યુટી સીએમ દેવેન્દ્ર ફડણવીસ આજે દિલ્હી જઈ રહ્યા છે. ભાજપના સૂત્રોનું કહેવું છે કે તેઓ અમિત શાહને મળવાના છે. ફડણવીસ બુધવારે રાજ્યમાં ભાજપના ખરાબ પ્રદર્શનની જવાબદારી સ્વીકારીને પદ છોડવાની રજુઆત કરી હતી.
ફડણવીસે કહ્યું, “મહારાષ્ટ્રમાં લોકસભા ચૂંટણીમાં અમને જે પણ નુકસાન થયું છે તેની સંપૂર્ણ જવાબદારી હું લઉં છું. તેથી, હું ટોચના નેતૃત્વને વિનંતી કરું છું કે મને મંત્રી પદ પરથી છુટો કરવામાં આવે. કારણ કે મારે પાર્ટી માટે કામ કરવાની અને રાજ્યની વિધાનસભા ચૂંટણીની તૈયારીઓમાં મારો સમય ફાળવવાની જરૂર છે. લોકસભા ચૂંટણીમાં ભારતીય જનતા પાર્ટીએ મહારાષ્ટ્રની 48 લોકસભા સીટોમાંથી માત્ર 9 સીટો જીતી હતી. ગઈ વખતે 2019માં પાર્ટીએ 23 સીટો જીતી હતી. જ્યારે, તેના સાથીદાર પક્ષ શિવસેના (શિંદે)ને 7 અને NCP (અજિત)ને 1 બેઠક મળી.
