ઓચિંતું પૂર આવ્યું અને પૂરો પરિવાર પાણીના પ્રવાહમાં તણાઇ ગયો

લોનાવલામાં ભયાનક અકસ્માતમાં એક આખો પરિવાર પાણીના જોરદાર પ્રવાહમાં તણાઇ ગયો છે. પ્રાથમિક વિગતો મુજબ આ દુર્ઘટનામાં 36 વર્ષીય મહિલા અને 13 વર્ષ અને 8 વર્ષની બે બાળકીઓના મોત થયા છે. ડેમ પાસે નદીમાંથી ત્રણ મૃતદેહ મળી આવ્યા છે. આ તરફ હજી પણ પાણીના જોરદાર પ્રવાહમાં પરિવાર સહિત બે બાળકોની શોધખોળ ચાલુ છે.
અકસ્માતનો એક ભયાનક વીડિયો સામે આવ્યો છે જેમાં જોઈ શકાય છે કે, આખો પરિવાર પાણીના જોરદાર પ્રવાહથી ઘેરાયેલો છે. ત્યાં હાજર લોકો તેમની મદદ કરવાનો પ્રયાસ કરી રહ્યા છે. વીડિયોમાં જોઈ શકાય છે કે, કોઈ તેમને દોરડું ફેંકીને બચાવવાની કોશિશ કરી રહ્યું છે તો કોઈ બધાને એક સાથે બાંધી રાખવાની સલાહ આપી રહ્યું છે. થોડી જ વારમાં તે બધા જોરદાર પ્રવાહ સાથે તણાવા લાગ્યા હતા.
અકસ્માત અંગે સ્થાનિક પોલીસે જણાવ્યું હતું કે, આ અન્સારી પરિવાર હતો જેઓ વરસાદના દિવસની મજા માણવા અને ભૂશી ડેમ પાસેના ધોધની મજા માણવા આવ્યો હતો. આ દરમિયાન એવું કહેવામાં આવી રહ્યું છે કે, અચાનક પૂર આવ્યું અને તેઓ પાણીના જોરદાર પ્રવાહની વચ્ચે ફસાઈ ગયા. ત્યાં હાજર લોકોએ આ પરિવારના સભ્યોને બચાવવાનો પ્રયાસ કર્યો હતો. જેને લઈ હાજર વ્યક્તિઓમાંથી કોઈએ દોરડું ફેંક્યું અને કોઈએ સૂચવ્યું કે, તેઓ એકબીજાને સ્કાર્ફથી બાંધે.
આ પછી થોડી જ ક્ષણોમાં એક પછી એક પરિવારના સભ્યો પાણીમાં ડૂબવા લાગ્યા અને સ્થળ પર ચીસો સંભલાવા લાગી હતી. વીડિયોમાં જોઈ શકાય છે કે, જોરદાર પ્રવાહના કારણે તે બધા એકબીજાથી અલગ થઈ જાય છે અને એક પછી એક પાણીમાં વહેવા લાગે છે. સ્થાનિક વહીવટીતંત્રના જણાવ્યા અનુસાર, આ દુર્ઘટના બાદ 36 વર્ષની મહિલા, 13 વર્ષની અને 8 વર્ષની બાળકીના મૃતદેહ મળી આવ્યા છે. આ સિવાય અકસ્માત બાદ 9 વર્ષના અને ચાર વર્ષના બાળકની શોધ કરવામાં આવી રહી છે.