અંકલેશ્વરમાં કેમિકલ ફેક્ટરીમાં એસિટોન, પ્રોમો, ટ્રામાડોલ સહિત અન્ય કેમિકલને ચાર સ્ટેજમાં મૂકી એમડી ડ્રગ બનાવવાના રેકેટનો પર્દાફાશ થયો છે. અવસર કેમિકલ ફેક્ટરીમાં ભેજાબાજ એચઆર, લેબ ટેક્નિશિયન અને કેમિસ્ટ કરોડો રૂપિયાના ડ્રગ્સ બનાવતા હતા. પોલીસે જ્યારે કંપનીમાં રેડ કરી, ત્યારે ત્યાંથી 430 કિલોગ્રામ ડ્રગ્સ બનાવવા માટે રો-મટિરિયલ મળી આવ્યા છે. આ એમ ડી ડ્રગ્સ બનાવનાર કેમિકલના જાણકાર લોકો છે. જો આ રો-મટિરિયલથી ડ્રગ્સ બની ગયું હોત, તો તેની કિંમત ₹400 કરોડ જેટલી થશે.
અંકલેશ્વર જીઆઇડીસી એસ્ટેટમાં અવસર એન્ટરપ્રાઇસિસ નામની ફેક્ટરીમાં એમડી ડ્રગ્સનો જથ્થો બનાવનાર ચાર લોકોની પોલીસે ધરપકડ કરી છે. આ કંપનીનો માલિક અનિલ અમીન અમેરિકા રહે છે, પરંતુ કંપની ચલાવવાની જવાબદારી તેણે આરોપી વિશાલ પટેલને આપી હતી. ટૂંક સમયમાં વધારે પૈસા કમાવાની લાલચમાં પોતાના કંપનીમાં કામ કરનાર કેમિસ્ટ, એચઆર અને લેબ ટેક્નિશિયન સાથે મળીને આ લોકોએ ડ્રગ્સ બનાવવાનો ધંધો શરૂ કરી દીધો હતો. તેઓ છેલ્લા છ મહિનાથી ડ્રગ્સ બનાવી રહ્યા હતા. બે કિલો ડ્રગ્સ આરોપીઓએ મુંબઈમાં પણ સપ્લાય કર્યુ છે.
ચાર સ્ટેજમાં આ લોકો ડ્રગ્સ બનાવતા હતા. ચાર સ્ટેજમાં ડ્રગ્સ બનાવવામાં લગભગ 15થી 20 દિવસ લાગતા હતા. ક્રિસ્ટલ ફોર્મથી પાવડર ફોર્મ અને ત્યાર પછી પાવડર ફોર્મથી ક્રિસ્ટલ ફોર્મમાં કન્વર્ટ કરવા માટે તેને હીટ આપવામાં આવતું હતું. સહેલાઈથી મળી જનાર કેમિકલથી આરોપીઓ એમડી ડ્રગ્સ બનાવતા હતા. એસિટોન, પ્રોમો, ટ્રામાડોલ સહિત અન્ય કેમિકલ સાથે એમડી ડ્રગ્સ આ લોકો બનાવી રહ્યા હતા. આ સમગ્ર મામલે પોલીસ કમિશનર અનુપમસિંહ ગેહલોતે જણાવ્યું હતું કે, વેલંજા ગામ પાસેથી આરોપીઓની ધરપકડ કરવામાં આવી છે. આરોપીઓ પાસેથી બે કિલો ડ્રગ્સ મળી આવ્યું હતું. જેની કિંમત બે કરોડ રૂપિયા છે. આરોપીઓએ જણાવ્યું હતું કે અંકલેશ્વર જીઆઇડીસીમાં આવેલી અવસર એન્ટરપ્રાઇસિસ કંપની છે. જે કેમિકલના બિઝનેસ સાથે સંકળાયેલી છે. આ તમામ લોકો કર્મચારી છે. અલગ અલગ વિભાગમાં તેઓ કામ કરે છે.
