સ્કૂલમાં ફાયરિંગથી હચમચી ગયું સ્વીડન, 10નાં મોત

સ્વીડનમાં એક વયસ્કોની એક શાળામાં થયેલા ગોળીબારમાં દસ લોકોના મોત થયા હતા. આ હુમલામાં એક વ્યક્તિ ગંભીર રીતે ઘાયલ થયો છે. સ્થાનિક અખબાર સ્વીડિશ હેરાલ્ડ અનુસાર, રાજધાની સ્ટોકહોમથી 200 કિમી પશ્ચિમમાં ઓરેબ્રો શહેરની રિસબર્ગસ્કા સ્કૂલમાં બપોરે 1 વાગ્યે ગોળીબાર થયો હતો. આ ઘટના ત્યારે બની જ્યારે મોટાભાગના વિદ્યાર્થીઓ શાળામાં હાજર હતા.
સ્વીડિશ પોલીસે કહ્યું – પોલીસે કહ્યું કે તેઓ મૃતકોની ઓળખ કરી રહ્યા છે. તેઓ હુમલાખોરોના હેતુ જાણવાનો પ્રયાસ કરી રહ્યા છે પરંતુ હાલમાં તેમને નથી લાગતું કે આ ઘટના આતંકવાદ સાથે જોડાયેલી છે. ઘાયલોની સંખ્યા પણ વધી શકે છે. ઘણા સ્થાનિક મીડિયા અહેવાલોમાં, હુમલાખોર સીરિયન મૂળનો હોવાનું કહેવામાં આવી રહ્યું છે. જોકે, તેની સત્તાવાર જાહેરાત કરવામાં આવી નથી.
ડેઇલી એક્સપ્રેસ યુકેના અહેવાલ મુજબ, આ વર્ષે જાન્યુઆરીમાં સ્વીડનમાં 31 સ્થળોએ વિસ્ફોટ થયા હતા. આ ઉપરાંત કુરાન બાળીને દુનિયાભરમાં ચર્ચામાં આવેલા સલવાન મોમિકાનું પણ ખૂન કરવામાં આવ્યું હતું. આ હત્યામાં વિદેશી કનેક્શનની તપાસ કરવામાં આવી રહી છે. અહેવાલો અનુસાર, વિસ્ફોટો પછી, સ્ટોકહોમમાં ગભરાટ એટલો વધી ગયો છે કે તેની તુલના ‘બગદાદ’ સાથે કરવામાં આવી રહી છે. હવે, જ્યારે ભાડા પર ઘર આપતા એજન્ટો જાહેરાતો આપે છે, ત્યારે તેઓ ખાસ કરીને કોલમમાં લખે છે કે આ વિસ્તારમાં કોઈ બોમ્બ વિસ્ફોટની ઘટના બની નથી.
રોઇટર્સના અહેવાલ મુજબ, ડિસેમ્બર 2024માં સ્વીડનમાં 40 લોકોની ગોળી મારીને હત્યા કરવામાં આવી હતી. 1 કરોડ લોકોની વસ્તી ધરાવતા યુરોપિયન દેશ માટે આ ખૂબ જ ખરાબ આંકડો છે. નિષ્ણાતો માને છે કે સ્વીડનમાં થયેલી હિંસા પાછળ મધ્ય પૂર્વ અને બાલ્કન દેશોમાંથી આવેલા મુસ્લિમ ઇમિગ્રન્ટ્સનો હાથ છે. યુરોપમાં, બંદૂકથી થતા મૃત્યુના સંદર્ભમાં ફક્ત અલ્બેનિયા અને મોન્ટેનેગ્રો જ સ્વીડનથી આગળ છે.