સોમવારે એલોન મસ્કના સોશિયલ મીડિયા પ્લેટફોર્મ X નું સર્વર ઘણી વખત ડાઉન થયું હતું. એલોન મસ્ક દ્વારા X પર સાયબર હુમલો થયો હોવાનું જણાવ્યા પછી, ટેલિગ્રામ પરના કુખ્યાત પ્રો-પેલેસ્ટાઈન હેકર જૂથ ડાર્ક સ્ટોર્મ ટીમે આ સાયબર હુમલાની જવાબદારી લીધી. જ્યારે Xનું સર્વર સોમવારે સતત ડાઉન રહ્યું હતું, ત્યારે એલોન મસ્કએ આ અંગે પ્રતિક્રિયા આપી હતી. મસ્કે કહ્યું, ‘X પર સાયબર એટેક થયો છે. X પર દરરોજ સાયબર હુમલા કરવામાં આવે છે, પરંતુ આ વખતે Xને મોટા પાયે નિશાન બનાવવામાં આવ્યું છે. શું આ કોઈ ખતરનાક જૂથનું કામ છે કે કોઈ દેશ પણ આમાં સામેલ છે? તેની ચકાસણી કરવામાં આવી રહી છે.’
એલોન મસ્કની પ્રતિક્રિયા પછી, ટેલિગ્રામ પર કુખ્યાત પ્રો-પેલેસ્ટાઈન હેકર જૂથ ડાર્ક સ્ટોર્મ ટીમે સાયબર હુમલાની જવાબદારી લીધી અને કહ્યું કે એક્સનું સર્વર ડિસ્ટ્રિબ્યુટેડ ડિનાયલ ઑફ સર્વિસ (DDoS) હુમલાથી ડાઉન થયું હતું. ડિસ્ટ્રિબ્યુટેડ ડિનાયલ ઑફ સર્વિસ (DDoS) એટેક હેકિંગથી અલગ છે, પરંતુ એક સાયબર એટેક છે, જેમાં હેકર્સ વેબસાઇટ અથવા સર્વર પર એટલો બધો નકલી ટ્રાફિક મોકલે છે કે તે અટકી જાય છે અને તે વેબસાઇટનું સર્વર ડાઉન થઈ જાય છે. આ સાયબર હુમલામાં, ઘણાં વિવિધ કમ્પ્યુટર્સ અથવા બોટનેટ્સનો ઉપયોગ કરીને, સર્વરને એક જ સમયે વધુ પડતી વિનંતીઓ મોકલવામાં આવે છે, જેના કારણે તે વધુ પડતા ભારને કારણે કામ કરવાનું બંધ કરે છે.
ડાર્ક સ્ટોર્મ ટીમ હેકિંગ જૂથ વિશે વાત કરીએ, જેણે DDos હુમલા દ્વારા X સર્વરને ડાઉન કરવાની જવાબદારી લીધી, તે એક કુખ્યાત હેકર જૂથ છે, જેણે વિવિધ સરકારી અને ખાનગી સંસ્થાઓ પર હુમલો કર્યો છે. ફેબ્રુઆરી 2024 માં, આ જૂથે નાટો દેશો, ઇઝરાયેલ અને તેના સહયોગી દેશો પર સાયબર હુમલાની જાહેરાત કરી હતી. આ જૂથના હેકર્સ અત્યંત સંગઠિત સાયબર હુમલાઓ કરવા માટે વિશ્વભરમાં કુખ્યાત છે.
ભારતમાં, X લગભગ બપોરે 3 વાગ્યે પ્રથમ વખત ડાઉન થયું, 7.20 વાગ્યે ડાઉન થયું, ત્યાર બાદ રાત્રે અંદાજીત9.30 વાગ્યાની આસપાસ ડાઉન ગયું હતું. જો કે, મોટાભાગના અમેરિકન વપરાશકર્તાઓએ તેના વિશે ફરિયાદો નોંધાવી હતી. આઉટેજ મોનિટરિંગ વેબસાઈટ ડાઉનડિટેક્ટર અનુસાર ભારતમાંથી લગભગ બે હજાર ફરિયાદો દાખલ કરવામાં આવી હતી, જ્યારે અમેરિકાના 18 હજાર વપરાશકર્તાઓ અને બ્રિટનના લગભગ 10 હજાર લોકોએ તેની જાણ કરી હતી.
