ડીસામાં ઢુંવા રોડ પર આવેલી ગેરકાયદે ફટારડા બનાવતી ફેક્ટરી દીપક ટ્રેડર્સમાં મંગળવારે સવારે આગ બાદ ભીષણ બ્લાસ્ટ થયો હતો. જેમાં મધ્ય પ્રદેશના 21 મજૂરોના મોત થયા હતા. ડીસા બ્લાસ્ટ કેસમાં 21 શ્રમિકોનો ભોગ લેનાર ગેરકાયદે ફટાકડા ફેક્ટરીના સંચાલક પિતા-પુત્ર ખુબચંદ અને દિપક મોહનાનીને ડીસા કોર્ટમાં રજૂ કરવામાં આવ્યા હતા.ડીસાની એડિશનલ સિવિલ જજ અને જ્યૂડીશલ મેજિસ્ટ્રેટ ફર્સ્ટ કલાસ જજ કે.આર શર્માની કોર્ટે આરોપીઓના 11 એપ્રિલ સુધીના 8 દિવસના રિમાન્ડ મંજૂર કર્યા છે.
બીજી તરફ રાજ્ય સરકાર દ્વારા નિમવામાં આવેલી સ્પેશ્યલ ઇન્વેસ્ટિગેશન ટીમ દ્વારા ઘટના સ્થળે આજે તપાસ કરવામાં આવી. આ મામલે તપાસમાં એવું પણ જાણાવા મળ્યું છે કે આરોપી દિપક મોહનાની ડીસા શહેર યુવા ભાજપ સંગઠનમાં મંત્રી પદે રહી ચુક્યો છે. ડીસામાં ગેરકાયદેસર ફટાકડાની ફેક્ટરીમાં થયેલા વિસ્ફોટ કેસમાં પોલીસે આખરે એફઆઇઆર જાહેર કરી છે. આ કેસમાં ડીસા મામલતદાર વિ.કે.બારોટે ફરિયાદી તરીકે ફરિયાદ નોંધાવી છે. જેમાં ખુબચંદ મહનાણી અને તેના પુત્ર દિપક મોહનાણી સામે BNSની કલમ 105, 110, 125 (a), 125 (b), 326 (g), 54, તેમજ વિસ્ફોટક અધિનિયમની કલમો 9 (b), 12 અને વિસ્ફોટક પદાર્થ અધિનિયમની કલમો 3(b), 4,5,6 હેઠળ ડીસા રુરલ પોલીસ સ્ટેશનમાં ગુનો નોંધવામાં આવ્યો છે.
રાજ્ય સરકાર દ્વારા રચવામાં આવેલી તપાસ ટીમમાં ભાવિન પંડયા, IAS, સેક્રેટરી લેન્ડ રીફોર્મ્સ, મહેસૂલ વિભાગ (અધ્યક્ષ) અને વિશાલકુમાર વાઘેલા- નાયબ પોલીસ મહાનિરીક્ષક, એચ.પી.સંધવી ડાયરેકટર ફોરેન્સીક સાયન્સ લેબોરેટરી-ગાંધીનગર તેમજ જે.એ.ગાંધી, ચીફ એન્જીનિયર, માર્ગ અને મકાન વિભાગ ડીસા ખાતે આવી પહોંચ્યા હતા. અહીં તેમણે ફેક્ટરીમાં બ્લાસ્ટના બનાવ સ્થળે તપાસ કરી હતી.
