એન્ફોર્સમેન્ટ ડિરેક્ટોરેટએ 15 એપ્રિલ મંગળવારે કોંગ્રેસના નેશનલ હેરાલ્ડ અખબાર અને એસોસિયેટેડ જર્નલ્સ લિમિટેડ (AJL) સાથે જોડાયેલા મની લોન્ડરિંગ કેસમાં પ્રથમ ચાર્જશીટ દાખલ કરી. જેમાં સોનિયા ગાંધી, રાહુલ ગાંધી, સામ પિત્રોડા અને સુમન દુબેનાં નામનો સમાવેશ કરાયો છે. ED દ્વારા નેશનલ હેરાલ્ડ કેસમાં ચાર્જશીટ ફાઇલ કરી તેનો દેશભરમાં કોંગ્રેસના કાર્યકરો દ્વારા વિરોધ કરવામાં આવી રહ્યો છે, જેને પગલે અમદાવાદ બાદ વડોદરામાં કોંગ્રેસ નેતા અને કાર્યકરો દ્વારા વિરોધ પ્રદર્શન કરવામાં આવી રહ્યું છે, ત્યારે પોલીસ દ્વારા ટીંગાટોળી કરી નેતાઓ અને કાર્યકરોની અટકાયત કરવામાં આવી છે. જોકે, આ દરમિયાન વડોદરામાં તો એક કાર્યકરે પોલીસની ગાડી પર ચડીને વિરોધ નોંધાવ્યો હતો.
અમદાવાદમાં EDની ઓફિસ બહાર અમદાવાદ શહેર કોંગ્રેસ પ્રમુખની આગેવાનીમાં કાર્યકરો દ્વારા વિરોધ કરવામાં આવ્યો હતો. કાર્યકરોએ હાથમાં બેનર સાથે સૂત્રોચ્ચાર કરીને વિરોધ કર્યો હતો. જોકે, પરવાનગી વિના વિરોધ કરી રહેલા કોંગ્રેસના તમામ કાર્યકરોની પોલીસે અટકાયત કરી હતી. શહેર પ્રમુખ હિંમતસિંહ પટેલની પણ પોલીસે ટીંગાટોળી કરીને અટકાયત કરી હતી. પોલીસ દ્વારા કાર્યકરોને પણ જબરદસ્તી પકડીને ગાડીમાં બેસાડી દેવામાં આવ્યા હતા. આ દરમિયાન કેટલાક કાર્યકરોનું પોલીસ સાથે ઘર્ષણ થયું હતું. જેમને પોલીસે કોલરથી પકડીને ગાડીમાં બેસાડી દીધા હતા. તો બીજી તરફ વિરોધ કરી રહેલી મહિલાઓને પણ પોલીસ દ્વારા ખેંચીને પોલીસની ગાડીમાં બેસાડી દેવામાં આવી હતી.
વડોદરા શહેરમાં કોંગ્રેસ દ્વારા વિરોધ કરવામાં આવ્યો હતો. જેને પગલે શહેર કોંગ્રેસ પ્રમુખ ઋત્વિજ જોષી સહિત મોટી સંખ્યામાં કાર્યકરો દ્વારા ચકલી સર્કલ નજીક આવેલી GST ઓફિસ બહાર વિરોધ પ્રદર્શન કરવામાં આવ્યું હતું. કાર્યકરો દ્વારા મોદી હાય… હાય… ભાજપ હાય… હાય…ના નારા લગાવવામાં આવ્યા હતા. આ દરમિયાન કોંગ્રેસના નેતા કપિલ જોશી તો પોલીસની ગાડી પર ચડી ગયા હતા અને ગાડી પર ચડીને વિરોધ પ્રદર્શન કર્યું હતું.
