ભાવનગર,તા.૬
ભાવનગર લોકલ ક્રાઈમ બ્રાન્ચ પોલીસને શિહોર ડિવિઝન વિસ્તારમાં પેટ્રોલિંગ દરમિયાન મળેલી ચોક્કસ બાતમીના આધારે પોલીસે ભાવનગર-રાજકોટ રોડ પર બજુડ ગામના પાટીયા પાસેથી એક શખ્સને ગેરકાયદેસર હથિયાર સાથે ઝડપી પાડ્યો હતો.
લોકલ ક્રાઇમ બ્રાન્ચના સ્ટાફને બાતમી મળી હતી કે બજુડ ગામના પાટીયે મરૂન રંગનો શર્ટ પહેરેલો અને લાંબા વાળ ધરાવતો એક શખ્સ ગેરકાયદેસર હથિયાર સાથે ઉભો છે. આ માહિતીના આધારે પોલીસે ત્વરિત તપાસ કરતા વર્ણન મુજબનો શખ્સ મળી આવ્યો હતો. પોલીસે વિજયભાઈ શંભુભાઈ મેર ઉ.વ. ૩૨, રહે. લુવારા, તા.ગારીયાધારની અટકાયત કરી હતી.
આરોપીની તલાશી લેતા તેની પાસેથી લોખંડની સિલ્વર કલરની ચાલુ હાલતની એક પિસ્તોલ (ખાલી મેગઝીન સાથે) મળી આવી હતી. ૬ ઇંચની બેરલ અને ૪ ઇંચના હાથાવાળી આ પિસ્તોલની કિંમત રૂ. ૧૦,૦૦૦ આંકવામાં આવી છે. LCB એ મુદ્દામાલ કબ્જે કરી, આરોપી વિરુદ્ધ કાયદેસરની કાર્યવાહી હાથ ધરી છે. આગળની વધુ તપાસ માટે આરોપીને સોનગઢ પોલીસ સ્ટેશનને સોંપી દેવામાં આવ્યો છે.
